Ukraine yatangaje ko yasambuye drone 17 kuri 22 mu bitero vya drone, Uburusiya bwakoze mu ntara 9 zo muri Ukraine, mu masaha ya kare yo kuri uyu wa mbere.
Ibikoho birasa indege z’ingwano na za misile vya Ukraine vyarashe izo drone mu gitero catumye inyubakwa y’igorofa abanyagihugu babamwo yaka umuriro.
Iyo gorofa yubatse mu gisagara ca Kryvyi Rih, kiri hagati mu gihugu. Abategetsi baho batangaje ko ata bapfuye canke abakomeretse muri ico gitero. Abajejwe gutabara bashoboye gukura muri iyo nyubakwa y’igorofa abayibamwo.
Bulamatari w’intara ya Kirovohrad, Andriy Raykovych, yatangaje ko igitero ca drone c’Uburusiya casambuye ibibanza birimwo amahinguriro y’abikorera ku giti cabo, n’inyubakwa abanyagihugu babamwo ziri hafi yaho.
Yamara yavuze ko ata numwe yahasize ubuzima canke ngo akomereke. Igisirikare kirwanira mu kirere ca Ukraine, catangaje ko Uburusiya kandi bwarashe misile 7 mu bibanza bitari bike vyo muri Ukraine mw’ijoro ryashiriye uyu musi ku wa mbere.
Igitero ca misile Uburusiya bwakoze mu ntara ya Kharkiv iri mu buseruko bwa Ukraine, mw’ijoo ryashiriye kuri uyu wa mbere, cononye ikibanza c’abajejwe kurwanya imiriro, gikomeretsa umuntu umwe.
Iyo nkuru yatangajwe n’ibiro vy’igihugu bijejwe gutabara vyihutirwa vya Ukraine. (REUTERS)