Muri Sudani, umutwe witwara gisirikare wa Rapid Support Forces (RSF) wigometse ku butegetsi buriho, wakiriye neza ubusabe bw’inama ya ONU ishinzwe amahoro n’umutekano ku isi, bwo guhagarika intambara mu kwezi gutagatifu mu bayisilamu kwa Ramadan.
Ni nyuma y’amezi 11 y’intambara hagati y’aba barwanyi n’ingabo za leta. Ukwezi kwa Ramadan guteganijwe gutangira ku mugoroba wo ku cyumweru.
Mu itangazo ryasohowe n’umutwe w’aba barwanyi, bavuze ko biringiye ko aka gahenge kazagabanya umubabaro wibasiye abaturage ba Sudani kuko kazorohereza itangwa ry’imfashanyo.
RSF iravuga ko yizeye ko aka gahenge kazaca inzira yo mu rwego rwa politike yo kuzahagarika intambara ku buryo bwa burundu. Iyi ntambara yatangiye taliki 15 z’ukwezi kwa kane mu 2023 hagati y’umutwe wa RSF n’ingabo za leta ya Sudani.
Umuryango w’Abibumbye uvuga ko abantu bagera kuri miliyoni hafi 25 bangana na kimwe cya kabiri cy’abatuye Sudani, bakeneye imfashanyo. Abagera kuri miliyoni umunani bavanywe mu byabo kandi inzara ikomeje kwiyongera. Leta zunze ubumwe z’Amerika ivuga ko impande zombi zakoze ibyaha by’intambara.
Kuwa gatanu inama ishinzwe amahoro n’umutekano ku isi y’Umuryango w’Abibumbye yemeje umwanzuro watanzwe n’Ubwongereza wo guhagarika intambara mu kwezi kwa Ramadan. Uwo mwanzuro watowe n’amajwi 14 awushyigikiye. Uburusiya bwarifashe. Gusa uburyo uyu mwanzuro uzashyirwa mu bikorwa ntabwo burasobanuka.