Urukiko i Bangui muri Repuburika ya Santrafurika, rwarekuye by’agateganyo kuri uyu wa gatatu, abayobozi batavuga rumwe n’ubutegetsi kandi rusubika urubanza ku cyaha cyo gusebanya, kuzageza mu cyumweru gitaha.
Imiryango iharanira uburenganzira bwa muntu yamaganye ihigwa ry’abatavuga rumwe n’ubutegetsi bose muri Santrafurika, igihugu ONU ishyira muri bine bitari byatera imbere kw’isi.
Crepin Mboli Goumba, umunyamategeko akaba n’umuhuzabikorwa w’urugaga rw’abatavuga rumwe n’ubutegetsi, BRDC, rurwanya Perezida Faustin Archange Touadera, yagejejwe imbere y’urukiko rukuru nyuma y’iminsi itatu afunze, ashinjwa ibyaha byo gusebanya no gusuzugura urukiko.
Nyuma y’uko abamwunganira mu mategeko bashatse ko ibirego bihagarikwa, Matthieu Nana Bibi, uyoboye abacamanza, yabwiye uregwa ko “arekuwe by’agateganyo, kandi ko atagomba kuva i Bangui”
Mboli Goumba yabwiye urukiko ati: “Nari namaze kwitegura ikintu cyose gishobora kubera muri uru rubanza, ari nako yamagana ubutabera bwa Santrafurika bwasenyutse”.
Yavuye mu cyumba cy’urukiko yishimye atera hejuru avuga ngo “ndarekuwe, ndarekuwe”, imbere y’abayoboke babarirwa ku ntoki, ajya gusinya impapuro z’irekurwa rye.
Mboli Goumba, uyoboye ishyaka PATRIE unafite ubwenegihugu bw’Amerika, yatawe muri yombi ku cyumweru ubwo yari amaze kwurira indege yari hafi guhaguruka ijya muri Kameruni ivuye ku kibuga cy’i Bangui.
Umuryango Human Rights Watch, ufite icyicaro i New York, mu mwaka ushize wavuze ko ubutegetsi bwa Touadera "bukandamiza sosiyete sivile, itangazamakuru n’amashyaka atavuga rumwe na bwo”.
Human Rights Watch, igasaba iyo leta “guha ubwisanzure urwego rw’ubutabera”.