Afurika y’Epfo ejo kuwa kabiri yatangaje ko yasabye Urukiko Mpuzamahanga rw'Ubutabera gusuzuma niba icyemezo cya Isirayeri cyo kugaba ibitero mu mujyi wa Rafah mu karere ka Gaza gikeneye ibindi ibikorwa by’ingoboka bigiherekeje byo kurengera uburenganzira bw’Abanyepalestina.
Mu kwezi gushize, nanone ku busabe bw’Afurika y’Epfo, Urukiko Mpuzamahanga rw’Ubutabera rwategetse Isirayeri gukora ibishoboka byose igakumira jenoside ku Banyepalestina mu karere ka Gaza.
Isirayeri yahakanye ibiyivugwaho ko yaba ikora jenoside ku Banyepalestina mu ntambara irwana n’umutwe wa kiyisilamu wa Hamasi.
Isirayeri yasabye Urukiko Mpuzamahanga rw'Ubutabera kutakira icyo kirego ivuga ko yubahiriza amategeko mpuzamahanga kandi ifite uburenganzira bwo kwirwanaho.
Isirayeri yavuze ko iteganya kugaba ibitero mu mujyi wa Rafah aho Abanyepalestina bagera kuri miliyoni bahungiye intambara ibera mu karere ka Gaza kuva abarwanyi ba Hamasi bagabye igitero muri Isirayeei tariki 7 z’ukwezi kwa karindwi. (Reuters)