Kuri uyu wa gatanu, abakuru b’ibihugu bya SADC, Umuryango w’ubukungu muri Afrika y’amajyepfo, bakoze inama idasanzwe ku kibazo cy’icyorezo cya kolera, yibasiye akarere kabo.
Bahuriye ku buhanga bw’amashusho ya videwo. Yari iyobowe na perezida w’Angola, João Lourenço, ari nawe muyobizi w’inama yabo muri iki gihe.
Itangazo risoza inama rivuga ko batanze ubutumwe bw’akababaro ku miryango y’ababuze ababo kubera kolera no “kwifatanya nabo bibavuye ku mutima.”
Mu byemezo bafashe harimo ko ibihugu byabo bigomba guhuriza hamwe ibikorwa, birimo gushaka imiti ihagije, gukingira abaturage cyane cyane abegereye imipaka, gutsura isuku no gusukura amazi, gushyiraho urwego rushinzwe kuvura no gukimira icyorezo cya kolera, no kuruha ingengo y’imali ya ngombwa.
Abakuru b’ibihugu bya SADC basabye n’inkunga mpuzamahanga, cyane cyane by’umwihariko ikigo cy’Afrika gishinzwe gukumira indwara Africa CDC, amashami ya ONU yita ku buzima OMS, ku bana Unicef, n’ibiribwa PAM. Batoreye kandi mugenzi wabo wa Zambiya, Perezida Hakainde Hichilema kuba umuhuzabikorwa wabo muri uru rugamba.
Unicef ivuga ko kuva mu mwaka ushize w’2023, ibihugu 13 byo mu karere k’Afrika y’amajyepfo byakubiswe n’icyorezo cya kolera kidasanzwe. Iti: “Kugera kw’itariki ya 15 y’ukwezi kwa mbere k’uyu mwaka w’2024, abantu barenga 200,000 baranduye. Abasaga 3000 muri bo barapfuye.”
Ibihugu bya SADC kolera yibasiye cyane kurusha ibindi ni nka Zimbabwe, Zambia, Malawi, Mozambique na Tanzaniya (yari ihagariwe mu nama na minisitiri w’intebe Kassim Majaliwa). (VOA/SADC, Unicef)