Kongre y'Amerika mu Nzira yo Kwumvikanya ku Miriyaridi 60 zo Gufashisha Ukraine

Inama nshingamateka y’Amerika iri mu nzira yo kwumvikana ku mafaranga agera ku ma miriyaridi 60 y’amadorali yo guha Ukraine.

Abashingamateka bavyemeza bavuga ko umwanya n’umwanya abarepublikane bashobora kwemeza ivy’ayo mafaranga, mu gihe aba demokrate nabo vyitezweko babasubiriza mu ndumane mu kwemeza umugambi wabo wo gukaza umutekano w’imbibe mu ntumbero yo kugabanya abimukira binjira ku butaka bwa Amerika biciye mu nzira zinyuranye n’amategeko.

Mu Gifatwa nk’ubwumvikane bwa mpanguhe hagati y’abarepubliakne n’abademokrate, abarepublikane bazokwemeza kandi amategeko atuma bamwe mu bimukira bashitse ku butaka bwa Amerika binyuranye n’amategeko basubizwa iyo baje bava, abarepublikane nabo bemeze ivy’iyo mfashanyo kuri Ukraine.

Senateri w’umudemokrate Chris Murphy, ari imbere mu bahagarikiye ubwo bwumvikane bw’abarepublikane n’abademokrate, yabwiye abamenyeshamakuru ati: “ Isi yose ihanze amaso Amerika, ibaza birimwo ibi: Amerika vy’ukuri irashigikira incuti zayo? Amerika vy’ukuri irashigikira Demokarasi? Amerika iri magabo irinda ko hoba iyindi ntambara y’isi? Canke Amerika yaratereranye abagenzi bayo yigira sindabibazwa vya demokarasi n’amategeko mpuzamakungu?”

Senateri Mitch McConnell, atwara abarepublikane kuri ubu bafise intebe nke mu nama nkenguzamateka y’Amerika, nawe yagize ati: “ Aya ni amahirwe adanzwe, impande zitavuga rumwe zibwirizwa gukamisha kugira zigire ico zishitseko. Kuva kera twamye twizeza abadutoye ko tubwirizwa gukemura ikibazo c’imbibe. Ino reta ihari ntishobora kubikora tutabibahatiye.”

Imiriyaridiyi 60 reta y’Amerika yipfuza guha Ukraine, ziri mu mamiriyaridi 106 ibiro vya prezida w’Amerika birondera, muri yo harimwo n’ ayagera mu miriyaridi 14 yo gufasha Isiareyeri, n’ayandi yo gufasha Tayiwane kwikingira ico Amerika ifata nk’agasomborotso k’Ubushinwa.

Kuva Uburusiya butangura gutera Ukraine mu kwezi kwa kabiri ko mu 2022, Amerika imaze gufashisha Ukraine amadorari agera ku mamiriyaridi 100. Benshi mu barepublikane ntibashigikiye ko Amerika ibandanya guha imfashanyo Ukraine.