Rutahizamu w'ikipe y'igihugu ya Misiri, Mohamed Salah yasubiye mu Bwongereza kwivuza imvune yagize kugirango azashobore kuzakina umikino ya nyuma, Misiri iramutse iwugezeho.
Ibi byemejwe n'umutoza wungirije w'ikipe ya Liverpool Pep Lijnders.
Salah usanzwe ari na Kapiteni wa Misiri ntiyakinye umukino w'ejo wahuje Misiri na Cape Vert. Uyu mukino warangiye aya makipe yombi anganya ibitego 2-2. Byatumye Misiri ibona tike yo kuzakina muri kimwe cya munani.
Salah watsindiye inshuro ebyiri igihembo cy'umukinnyi mwiza ku mugabane w'Afrika yavunitse mu mukino wahuje Misiri na Gana.
Ubuyobozi bw'ishyirahamwe ry'umupira w'amaguru muri Misiri bwari bwatangaje ko Salah ashobora kuzaboneka kare agafasha ikipe ye.
Ariko umutoza Lijnders wa Liverpool we avuga ko amahirwe Salah afite yo gukina yazaboneka tariki ya 11 ari nawo munsi hazakinwa umukino wa nyuma w'igikombe cy'Afrika.