Abategetsi muri Repuburika ya demokarasi ya Kongo, bataye muri yombi abasoda batandatu bashinjwa kwica abasivili mu bushyamirane mu burasirazuba bw’igihugu.
Igisirikare kuri uyu wa kabiri cyavuze ko ubwo bushyamirane bwabereye mu mujyi wa Mangina muri teritwari ya Beni mu ntara ya Kivu ya ruguru kuri uyu wa mbere.
Umutekano warushijeho kuba muke guhera muri kwezi gushize, ubwo abagize inteko y’intara bashishikarije urubyiruko gufata intwaro bagakora imitwe mito y’abarwanyi kugira ngo bahanganye n’ingabo.
Ibi byavuzwe mw’itangazo ry’umuvugizi w’igisilikare gikorera mu karere, Antony Mwalushayi.
Umutu wavuzwe mw’itangazo ry’inteko ishinga amategeko, Alain Siwako, arabihakana. Yabwiye ibiro ntaramakuru, Reuters, kuri telefone ko abarwanyi badaturuka Mangina kandi ko umuvugizi w’igisirikare yamureze ibyo, ku mpamvu ze bwite.
Iryo tangazo ry’ingabo rivuga ko kuwa mbere, abasirikali bari kw’irondo bavumbukiweho n’urubyiruko rw’abarwanyi, barasa ku basivili.
Umunyamakuru wa Reuters yabaze imirambo irindwi y’abasivili muri uwo mujyi kuri uyu wa kabiri. Umwe mu bahatuye yavuze ko umuturanyi we, yari agiye iwe gufunga mbere yo guhunga, nibwo yaraswaga.
Kahindo Mbahikya wasimbutse urw’icyo gitero, yagize ati: “Uyu mugabo yari umubyeyi w’abana babiri, yishwe, afite imyaka 56”.
Abasoda 6 batawe muri yombi “baregwa n’igisirikare gukoresha ingufu z’umurengera kandi bavugwaho kwica abasivili bane”. Ibi biri mw’itangazo ry’ingabo.
Uburasirazuba bwa Kongo burimo imitwe y’abarwanyi, ibarirwa muri mirongo, imwe yasizwe n’intambara yo mu 1998 kugeza muri 2003.
Umwuka mubi kandi wariyongereye mu gihugu hose kuva Perezida Felix Tshisekedi yongeye gutorwa mw’itora ryakuruye impaka, ryabaye mu kwezi gushize. (Reuters)