Muri Repubulika ya demokarasi ya Kongo, abantu batari bake bakomeretse ubwo polisi yageragezaga kuburizamo imyigagaragambyo yatumijwe n’abanyapolitike batavuga rumwe na leta yo kwamagana ibyavuye mu matora.
Abigaragambije mu murwa mukuru Kinshasa barasaba ko ayo matora aseswa hagategurwa andi. Ni imyigaragambyo yabaye nubwo ubutegetsi bwari bwimye abigaragambya uruhushya rwo kubikora.
Polisi yazindutse igota ibiro bikuru bya kandida prezida Martin Fayulu, umwe muri batanu bahamagaje iyo myigaragambyo yo kwamagana ibizava mu matora. Abo bavuga ko amatora yabaye mu cyumweru gishize yaranzwe n’uburiganya no kwiba amajwi. Barasaba ko ibyayavuyemo bitakwemerwa.
Aho ku biro bya Fayulu, polisi yakoresheje ibyuka biryana mu maso kugirango itatanye abigaragambyaga, nk’uko bivugwa n’umuntu wabyiboneye wavuganye n’umunyamakuru w’ibiro ntaramakuru by’Abongereza, Reuters.
Fayulu yavuze ko, uko gukoresha ingufu kw’inzego z’umutekano byakomerekeje abaturage 11. Uyu mukandida avuga ko intego yabo yari uguhagurukira ku biro bye bakerekeza ku biro bya komisiyo y’igihugu y’amatora CENI.
Umuyobozi wa polisi mu mujyi wa Kinshasa, Blaise Kilimba Limba, avuga ko abapolisi babiri bakomerekeye muri ubwo bushyamirane. Imyigaragambyo mu tundi duke tw’umujyi yaburijwemo. Gusa, hari aho abaturage bafunze imihanda bakoresheje amapine batwitse.
Imiyigaragambyo nk’iyo yabaye no mu yindi mijyi nka Butembo mu burasirazuba bw’igihugu.
Imibare y’agateganyo igaragaza ko Prezida Felix Tshisekedi akomeje kwanikira abo bahanganye. Ku majwi arenga miliyoni esheshatu amaze kubarurwa, ari ku isonga n’amajwi 79 ku ijana.