Akanama k’amahoro ka ONU kongeye gutinza itora ku mwanzuro mushya ushaka uburyo imfashanyo yarushaho kugezwa mu ntara ya Gaza. Minisitiri w’intebe wa Isiraheli Benjamin Netanyahu yavuze atarya iminwa ko ibikorwa byo kwihimura bya gisirikare bizakomeza kugeza Hamas itsinzwe kandi Amerika yongeye kwemeza inkunga yayo kuri Leta y’abayahudi.
Itora ku mwanzuro mushya wo gufasha kwongera imfashanyo mu ntara ya Gaza rikaba ryongeye gutinzwa mu nteko ishinzwe umutekano kw’isi ya ONU. Lana Nusseibeh, uhagarariye Emira zinyunze z’abarabu mu muryango w’abibumbye yasobanuye impamvu. Agira ati: “Ntekereza ko imirwa mikuru ifite imigabane muri ibi, iri mu biganiro byo ku rwego rwo hejuru rwa dipolomasi, kugirango igere ku nyandiko izagira icyo ihindura muri Gaza. Dipolomasi ifata igihe”.
Abarwanyi binjiye muri Isiraheli mu buryo butunguranye taliki 7 z’ukwezi kwa 10 batwara bunyago abanyesiraheli barenga 240 hamwe n’abanyamahanga. Bishe kandi abantu bagera mu bihumbi 12.
Minisitiri w’ububanyi n’amahanga w’Amerika Antony Blinken yaragize ati: “Turumva ibihugu byinshi bisaba ko ubushyamirane burangira, ni ikintu twese twifuza kubona. Nta n’umwe numva asaba Hamas kureka kwihisha inyuma y’abasivili, ngo ifashe intwaro zayo hasi, iyamanike. Ejo, ibi bizaba birangiye, Hamas nibigenza gutyo”.
Cyakora minisitiri w’intebe wa Isiraheli, Benjamin Netanyahu, yumvikanishije ko imirwano itazahagarara kugeza igisirikare cya Isiraheli kigeze ku ntego zacyo. Yaragize ati:
“Kurandura Hamas, kurekura abantu bacu bagizwe imbohe no gukuraho ibikangisho mu ntara ya Gaza. Abakoresha iterabwoba ba Hamas bose, guhera kuwa mbere kugera kuwa nyuma, bose bazashira. Bafite amahitamo abiri gusa: kuyamanika cyangwa gupfa”.
Guverinema ya Netanyahu cyakora, irimo kwongererwa igitutu n’abo mu miryango y’abantu 100 bakigizwe ingwate, kugirango igirane amasezerano mashya na Hamas kandi isubize iwabo abo bafashwe bugwate. Hamas yavuze ibyo isaba, kugirango irekure izindi ngwate, harimo ko intambara ihita ihagarara, kandi kugeza ubu agahenge kaganiriweho, karacyari urujijo.