Muri Etiyopiya, uwari minisitiri ushinzwe iby'amasezerano y'amahoro, Taye Dendea, yirukanwe, ahita atabwa muri yombi. Aregwa gukorana n'inyeshyamba. Taye Dendea ni umwe mu bayobozi bo hejuru mu ishyaka rya minisitiri w’intebe, Abiy Ahmed. Yafunzwe yari amaze iminsi anenga guverinoma ku mbuga nkoranyambaga, avuga ko yananiwe kugarura amahoro mu gihugu.
Urugero: mu cyumweru gishize, yatangaje ko guverinoma ifite uruhare mw’ipfuba ry’imishyikirano ya kabiri yabereye mu kwezi gushize muri Tanzaniya n’umutwe w’inyeshyamba z’abo mu bwoko bwa Oromo, Oromo Liberation Army, OLA mu magambo magufi, uzwi na none ku mazina ya Oneg na OLF-Shene.
Nyamara kuri uyu wa kabiri, ibitangazamakuru bya leta ya Etiyopiya byo bivuga ko yazize kugambana n’inyeshyamba kugirango bahirike ubutegetsi. Ku ruhande rwayo, Polisi y’igihugu yatangaje ku rubuga rwayo rwa Facebook ko yafunze Taye kuri uyu wa kabiri kubera “gukorana n’imitwe irwanya amahoro kugirango basenye Etiyopiya.”
Iri tangazo riherekejwe n’amafoto y’imbunda, amabendera y’inyeshyamba, na telefone zigendanwa. Polisi yemeza ko yabisanze kwa Taye mu rugo iwe kandi ko ari bimwe mu bikoresho byo gushira mu ngiro “umugambi wo guhungabanya igihugu.” Rivuga ko bahafatiye n’umwe mu nyeshyamba wa OLF-Shene, wakoreshaga ibimuranga byinshi bitandukanye, wari uhihishe.
OLF-Shene irwanya leta ya Etiyopiya kuva mu 2018. Guverinoma ya Etiyopiya yayishyize ku rudonde rw’imitwe y’iterabwoba. Komisiyo y’igihugu y’uburenganzira bwa muntu ivuga ko imirwano yakurikiye imishyirano ya nyuma yapfubye imaze guhitana abasivili barenga 50.
Taye Dendea nawe ni uwo mu bwoko bwa Oromo, bwa mbere bufite abaturage benshi kurusha andi moko yo muri Etiyopiya. Ni nka 1/3 cya miliyoni 120 zigize igihugu. (AFP, Reuters)
