Roketi zarashwe kuri Ambasade y’Amerika i Baghdad, mu murwa mukuru wa Iraki, kuri uyu wa gatanu, mu gitero bikekwa ko cyagabwe n’imitwe y’abarwanyi bari ku ruhande rwa Irani, bibasiye ahari inyungu z’Amerika muri Siriya no muri Iraki, bitewe n’uko Washington ishyigikiye Isiraheli mu ntambara yayo mu ntara ya Gaza muri Palestina.
Nta mutwe wigambye icyo gitero. Umuvugizi w’ambasade yavuze ko nta muntu cyahitanye. Itangazamakuru rya Leta ryavuze ko cyashenye icyicaro gikuru cy’ikigo gishinzwe umutekano cya Iraki.
Urusaku rw’ibisasu byaturitse rwumvikanye hafi y’ambasade, mu murwa mukuru rwagati, mu masaha ya saa kumi za mu gitondo uyu munsi kuwa gatanu. Hahise havuzwa uturumbeti two kuburira abantu gushaka aho bihisha.
Ni ubwa mbere Ambasade y’Amemerika, iraswaho. Birasa nko kwagura ahagabwa ibitero, nyuma yo kubigaba ku bigo bya gisirikare birenga icumi, ahari ingabo z’Amerika muri Iraki no muri Siriya guhera hagati mu kwezi kwa 10. Hari ubwoba ko ubushyamirane bwaba bwgiye gukwira ku gice kinini mu karere.
Sheikh Ali Damoush, umuyobozi mukuru mu mutwe wa Hezbollah w’abanyalibani, mu nyigisho yatanze kuri uyu wa gatanu, yavuze ko, ibitero by’imitwe iri ku ruhande rwa Irani mu mpande zose z’uburasirazuba bwo hagati, bigamije gushyiraho igitutu ngo Isiraheli ihagarike ibitero byo kwihimura mu ntara ya Gaza. Ntabwo ariko yavuze nyirizina ku gitero cyo kuri uyu wa gatanu.
Minisitiri w’intebe wa Iraki Mohammed Shia al-Sudani, yavuze ko ibitero by’iterabwoba bihangayikishije. Yarahiriye kurinda intumwa z’amahanga, kandi
abumbatira umutekano ubu ujegajega, yibanda ku bukungu no kw’ishoramali ry’amahanga, harimo n’irituruka muri Leta zunze ubumwe z’Amerika.
Mw’itangazo, Sudani yategetse ibigo bishinzwe umuteko gukurikirana abagabye igitero, yise “abatagendera ku mategeko b’imitwe idahagarariye mu buryo ubwo aribwo bose, ugushaka kw’abaturage ba Iraki”.
Ibitero birenga icumi byagabwe ku ngabo z’Amerika muri Iraki no muri Siriya, byigambwe n’abarwanyi b’umutwe ubogamiye kuri Irani w’abashi’ite b’abayisilamu ukorera mu kizwi nka “Islamic Resistance in Iraq”.
Amerika yasubije ikoresheje ibitero byahitanye abarwanyi byibura 15 muri Iraki n’abagera muri 7 muri Siriya.