Inteko ishinga amategeko y'Uburusiya yemeje ko amatora y'umukuru w'igihugu azaba ku itariki ya 17 y'ukwezi kwa gatatu gutaha. Perezida Vladimir Putin, w’imyaka 71 y’amavuko, ntaratangaza niba aziyamamaza cyangwa niba ataziyamamaza.
Abanyamakuru babajijeho umuvugizi we, Dmitry Peskov, arabasubiza gusa, ati: “Mwigira ubwira.” Putin ari ku butegetsi kuva mu 1999. Ni we utegetse Uburusiya igihe kirekire kurusha abandi bose bamubanjirije.
Itegeko nshinga, ryavuguruwe mu 2020, rimwemerera kongera gutorwa izindi manda ebyiri. Manda y’umukuru w’igihugu cy’Uburusiya ni imyaka itandatu. Putin ashobora rero gutegeka kugera mu 2036.
Ababikurikiranira hafi basanga ntawe ushobora guhangana na Putin. Uwa mbere mu batavuga rumwe nawe, Alexei Navalny w’imyaka 47 y’amavuko, ari muri gereza. Yakatiwe gufungwa imyaka 30 ku byaha byitwa iby’ubuhezanguni. Mu itangazo yanyujije ku mbuga nkoranyambaga, yasabye abayoboke be kuzatora undi uwo ari we wese utari Putin.
Abandi batangaje ko baziyamamaza ntibazwi cyane. Barimo uwitwa Igor Girkin, uzwi na none kw’izina rya Igor Strelkov. Nawe ari muri gereza kuva mu kwezi kwa karindwi gushize. Aregwa nawe ubuhezanguni. Ntaraburana. Kuri uyu wa kane, urukiko rwongereye igihe cye cyo gufungwa by’agateganyo ho andi mezi atandatu.
Abaturage b’intara za Ukraine zigaruriwe n’Uburusiya nabo bazatora. Aya matora azaba abaye nyuma y’isabukuru y’imyaka ibiri y’intambara Uburusiya bwagabye kuri Ukraine ku itariki ya 24 y’ukwa kabiri 2022. (AP, Reuters)