Muri Leta zunze ubumwe z'Amerika, urukiko rw'ubujurire rwo ku rwego rwa Leta ya New York rumaze kwemeza ko Donald Trump abujijwe "gusebya" ku mugaragaro abakozi b'urukiko ruburanisha urubanza rwe rw'amahugu n'uburiganya.
Ku itariki ya 3 y’ukwa cumi gushize, umucamanza Arthur Engoron, ukuriye urubanza mu rukiko rw’iremezo, yaciye iteka ribuza Trump gukomeza gusebya, by’umwihariko, umwanditsi mukuru w’urukiko ku mbuga nkoranyambaga.
Trump yabirenzeho, maze umucamanza amuca ihazabu y’amadolari 15,000.
Trump yarajuriye, avuga ko umucamanza yanize uburenganzira bwe, yemerewe n’itegeko nshinga, bwo kuvuga ikimuri ku mutima. Hashize ukwezi n’ibyumweru bibiri nyuma y’iteka rya Engoron, ku itariki ya 16 y’ukwa 11, undi mucamanza wo ku rwego rw’ubujurire yahagaritse iri teka by’agateganyo, mu gihe urukiko ruzaba rusuzuma ubujurire bwa Trump.
Kuri uyu wa kane rero, inteko y’abacamanza bane bashubijeho iteka ry’umucamanza Engoron, bavuga ko Trump n’abavoka be bose babujijwe gusebya abakozi b’urukiko rw’iremezo, “kuko aba abikora yabigerendereye.”
Umwanzuro wabo ariko ntubuza Trump gutangaza icyo ashaka ku mucamanza Engoron cyangwa ku mushinjacyaha mukuru wa Leta ya New York, Laetitia James.
Uyu arega Donald Trump n’abahungu be babiri bakuru amanyanga mu bucuruzi bwabo. Asaba abacamanza kubahanisha ihazabu y’amadolari arenga 300,000,000 (miliyoni 300) no kubabuza kongera gukora ubucuruzi ubwo ari bwo bwose muri Leta ya New York, avuga ko bungutse mu buryo bunyuranyije n’amategeko. Bo barabihakana.
Urubanza rwatangiye mu kwezi kwa cumi gushize. Rushobora kuzarangira mu mpera z’uku kwezi kwa 12 kuje.
Uretse uru rubanza rwo ku rwego rwa Leta ya New York (mu burasirazuba bwa Leta zunze ubumwe z’Amerika), Trump arimo araburana ikindi kirego cyo kureka gusebya abakozi b’urukiko rwo ku rwego rw’igihugu rwa hano i Washington D.C. rumukurikiranyeho ibyaha byo gushaka kubirizamo ibyavuye mu matora y’umukuru w’igihugu yo mu 2020.