Ubuyobozi bwa Perezida Joe Biden wa Leta zunze ubumwe z’Amerika, burashaka gukorana na Kongre mu kuguvurura amasezerano y’ubuhahirane hagati y’Amerika n’Afurika, aho kuyongerera igihe gusa nta mpinduka.
Minisitiri w’ububanyi n’amahanga, Antony Blinken, yabivuze uyu munsi kuwa gatanu. Uyu mugambi w’ubufatanye mu bucuruzi, AGOA, bivuze The African Growth and Opportunity Act wemejwe mu 2000. Ugamije gufasha ibihugu by’Afurika kuzamura ubukungu bwabyo, utanga amahirwe yo kugeza ibicuruzwa ku masoko y’Amerika bitadanze amahoro.
Uteganyijwe kugeza mu kwezi kwa cyenda muri 2025 kandi umaze kwongererwa igihe incuro ebyiri. Ibihugu by’Afurika birasahaka kubona indi myaka byibura 10 nta gihindutse kugirango bihumurize abanyemari n’abashoramari.
Mu butumwa yatanze mu buryo bwa videwo, Minisitiri w’ububanyi n’amahanga w’Amerika, Antony Blinken yabwiye abari mu nama y’ubuhahirane, hagati y’Amerika n’Afurika, muri Afurika y’epfo, ati: “Perezida Biden ashyigikiye byuzuye ko umugambi AGOA wongera kwemezwa. Ariko ntabwo dushaka gusa kuwongerera igihe, turashaka gukorana na Kongre y’Amerika, kugirango urusheho kuba mwiza”.
N’ubwo uwo mugambi washyigikiwe n’abashingamategeko b’Amerika, ku mpande zombi, basanga ufite akamaro gakomeye bitewe n’ijambo Ubushinwa buvuga rikijyana muri Afurika, hari ukutumvikana ku bijyanye no kuwuvugurura.
Abasenateri barenga icumi, barakora ibishoboka ngo uwo mugambi wongererwe igihe vuba na bwangu. (Reuters)
