Abategetsi b'abasirikare bakoze kudeta muri Nijeri basavye kuganira n'Ubufransa ku bijanye n'ingingo y'ico gihugu yo gukura abasirikare baco muri Nijeri. Ubufransa bwatangaje ko buzoba bwaheraheje ico gikorwa mu mpera z'uyu mwaka.
Abasirikare bayoboye Nijeri, mw’itangazo ryasomwe kuri televiziyo mw’ijoro ryo ku musi wa mbere, batangaje ko ikirangamisi ku ngingo y’Ubufransa yo gukura abasirikare bayo muri ico gihugu gitegerezwa gushirwaho mu biganiro n’amasezerano yumvikanyweko n’impande zompi.
Ku musi w’Imana, Prezida w’Ubufransa, Emmanuel Macron, yatangaje ko igihugu ciwe kizokura ambasaderi waco muri Nijeri. Yavuze ko bizokwirikirwa n’ingingo yo gukura abasirikare baco muri ico gihugu mu mezi ari imbere. Vyasabwe n’abasirikare bakoze kudeta muri Nijeri kw’italiki 26 y’ukwezi kw’indwi kw’uyu mwaka.
Abategetsi ba Nijeri, barakiye neza ivyatangajwe na Prezida w’Ubufransa, Emmanuel Macron, ku musi w’Imana urangiye. Batangaje ko ari intambwe ikomeye ku bijanye n’ubwigenge bw’igihugu cabo. Barindiriye ko abategetsi b’Ubufransa babishira mu ngiro. (AFP)