Umutegetsi mw'ishirahamwe ryo gufashanya mu vy'ubutunzi ry'ibihugu vyo muri Afrika yo mu burengero, CEDEAO, yatangaje ko iryo shirahamwe ryiteguriye kurungika inteko muri Nijeri hamwe utwigoro two kugarukana ubutegetsi bwisunga ibwirizwa shingiro muri ico gihugu, bwoba impfagusa.
Abdel-Fatau Musah, ajejwe ibibazo vya politike amahoro n’umutekano, yarabwiye abakuru b'igisirikare b'ibihugu bigize iryo shirahamwe bariko babonana muri Ghana kuri uyu wa kane kugira baganire ivyerekeye izo nteko.
Yatanze akarorero k’irungikwa ry’inteko zaryo muri Gambiya, Liberiya n’ahandi, ryabaye muri kahise. Yongeyeko n’iyo vyaba ngombwa, bazoja muri Nijeri n’ibikoressho vyabo vya gisirikare hamwe n’uburyo bwabo kugira bagarukane ubutegetsi bugendera kw’ibwirizwa shingiro muri Nijeri.
Musah yatangaje ko hari ibindi bihugu bigendera kuri demokrasi bibashigikiye muri uyo mugambi vyovyakira neza.
Yagirije abategetsi bakoze kudeta muri Nijeri yakuye ku butegetsi, Prezida Mohamed Bazoum kw’italiki 26 y’ukwezi kw’indwi kw’uyu mwaka, ko, bariko barakina umukino w’ubwenge n’iryo shirahamwe mu kwanka kubonana n’intumwa zaryo.
Abdel-Fatau Musah yariyamirije yivuye inyuma ivyatangajwe n’abakoze kudeta vy’uko bafise ivyemezo vyo gushingira intahe imbere ya sentare Prezida Mohamed Bazoum batembagaje. Ishirahamwe mpuzamakungu ONU, umuryango w’ubumwe bw’Uburaya na CEDEAO, yose yarerekanye impungenge ku buryo Bazoum apfungiwemwo.