Intara y’Amhara muri Etiyopiya, yari imaze iminsi iberamo imirwano ikomeye, yarimo umutuzo kuri uyu wa kane, nk’uko abahatuye babyivugiye. Ni nyuma y’uko guverinema y’igihugu cyose, ihirukanye abarwanyi.
Guverinema ya Etiyopiya kuri uyu wa gatatu yari yavuze ko yashyizeho amasaha y’umukwabu mu mijyi itandatu minini yibasiwe n’ubushyamirane mu karere, harimo umurwa mukuru Bahir Dar n’umujyi mutagatifu wa Lalibela, aho UNESCO yagize ikimenyetso ndangamurage ku rwego rw’isi.
Urwego rushinzwe ibihe bidasanzwe mu gihugu rwatangaje ko ingamba zafashwe nyuma yo kuvuga ko ingabo z’igihugu “zabohoje” imijyi yari ifitwe n’abarwanyi bafatwa nk’amabandi mu karere.
Abatuye i Bahir Dar babwiye ibiro ntaramakuru by’abafaransa, AFP, ko ingabo z’igihugu cya Etiyopiya zagiye urugo ku rundi zireba ko ntabakekwa baba bahihishe, ariko ko nta rusaku rw’imbunda rwumvikanye.
Ababa i Lalibela no mu mujyi wa Gondar, wa kabiri mu bunini mu karere, babwiye AFP ibisa n’ibyo, bavuga ko abarwanyi bazwi kw’izina rya Fano basubiye inyuma.
Ingendo z’indege mu karere kuri uyu wa kane zasubukuwe nyuma y’uko isosiyete, Ethiopian Airlines, itangaje ko ihagaritse igihe gito yari yihaye cyo kuba isubitse ingendo mu mijyi ya Bahir Dar na Gondar.
Nta mibare y’abasize ubuzima mu bushyamirane yashyizwe ahagaragara, ariko abaganga ku bitaro mu mijyi ibiri yabayemo imirwano, ejo babwiye AFP, ko hari abasivili batari bake bishwe n’abakomeretse. (AFP)