Ubutungane bw’Uburusiya bwaciriye umunyororo w’imyaka 19 umunyapolitike, Alexei Navalny, aza imbere mu batavuga rumwe n’ubutegetsi bwa Prezida Vladimir Putin.
Umunyororo w’imyaka 19 Alexei Navalny yaciriwe uje wiyongera ku yindi myaka 9 yari yaraciriwe. Ivyaha bishasha uwo munyepolitike ari mu bakomeye batavuga rumwe n’ubutegetsi bw’Uburusiya yagirijwe, birimwo “ivyiyumviro vy’intagondwa”.
Urubanza rwa Alexei Navalny w’imyaka 47 rwabereye mu mwiherero. Akimara gusomerwa urubanza yaciriwe, yabonetse amwenyura kandi atekanye.
Alexei Navalny azofungirwa mw’ibohero rirungikwamwo abagirizwa ivyaha bikomeye birimwo ubugizi bwa nabi burengeje urugero, abaciriwe umunyororo wo guherayo, n’abashobora kubangamira ikibano.
Ishiramwe mpuzamakungu ONU ryasavye Uburusiya kurekura vyihuse Alexei Navalny, Ubumwe bwa Buraya, nawo buvuga ko urubanza rwaciriwe Alexei Navalny atari urwo kwihanganira, impande zirimwo Ubudagi, Ubufaransa n’amashirahamwe mpuzamakungu arimwo ayaharanira agateka ka zina muntu, zivumera zivuga ko urubanza rwaciwe ari urwa ngondagonde.
Ejo ku wa kane, Alexei Navalny yari yavuze ko yiteze gucirwa umunyororo mw’imyaka myinshi. Navalny yatawe muri yompi mu 2021, inyuma yo gutahuka avuye mu Budagi, aho yari yagiye kwivuriza ishano rikaze abatari bake bemeza ko yahawe n’ubutegetsi bw’Uburusiya.
Yamenyekanye cane mu matohoza n’urugamba rwo kurwanya ibiturire mu Burusiya no gutunganya imyiyerekano yiyamiriza ubutegetsi bwa Perezida Vladimir Putin.
Uburusiya bumufata nk’inkozi y’ikibi yo ku rwego rwo hejuru, bukemeza ko ivyaha vyose yagirizwa ataho bihuriye na politike. Amaze gufatirwa ibihano, Uburusiya bwita ivyo kumusubiza ku mu rongo incuro zababa 20. Kuri izo ncuro zose, yugaranirwa mu kazu ka wenyene, agategekwa kwumviriza amajambo ya Perezida Vladimir Poutine.
Uburusiya Bwongereje Umunyororo w'Imyaka 19 kuri Navalny Atavuga Rumwe n'Ubutegetsi
Alexei Navalny atavuga rumwe n'ubutegetsi bw'Uburusiya