Abategetsi b'ibihugu vyo muri Afrika yo mu burengero bazobonanira ku murwa mukuru wa Nijeriya, Abuja, ku musi w'Imana kugira baganire ivyerekeye kudeta yabaye ku musi wa gatatu muri Nijeri.
Iyo nama yatangajwe na Dele Alake, umuvugizi wa prezida wa Nijeriya, Bola Tinubu, ayoboye muri iki gihe ishirahamwe ryo gufashanya mu vy’ubutunzi ry’ibihugu vyo muri Afrika yo mu burengero, CEDEAO. Alake yatangaje ko inyuma ya kudeta yabaye muri Nijeri, umuyobozi wa CEDEAO, Bola Tinubu, azokwakira inama idasanzwe y’abategetsi b’ibihugu vyo muri Afrika yo mu burengero, ku musi w’Imana, itariki 30 y’ukwezi kw’indwi ku murwa mukuru, Abuja.
Prezida Tinubu, mu mabanga yiwe y’umuyobozi w’ishirahamwe CEDEAO, yariyamirije ukugene ibintu vyifashe muri iki gihe mu gihugu kibanyi ca Nijeri. Yemeye ko ishirahamwe CEDEAO n’amakungu bizokora ibishoboka vyose kugira bikingire demokrasi n’ukubona ko intwaro ibereye ibandanya gushinga imizi mu karere ko muri Afrika yo mu burengero.
Icegera ca Prezida wa Amerika, Kamala Harris n’umunyamabanga mukuru w’ishirahamwe ONU, Antonio Guterres, baravuganye kw’itelefone, umwe umwe wese ukwiwe, ku musi wa kane, na prezida wa Nijeriya, BolaTinubu. Barashigikiye ingingo zafashwe n’ishirahamwe CEDEAO hamwe nawe mu ntumbero yo kugarukana intwaro yisunga ibwirizwa shingiro smuri Nijeri. (AFP)