Hano muri Leta zunze ubumwe z'Amerika, Hunter Biden, umuhungu wa perezida wa Repubulika, yitabye urukiko rwo ku rwego rw'igihugu kuri uyu wa gatatu. Ibyaha akurikiranyweho birimo kutishyura imisoro.
Urukiko Hunter Biden yitabye rwicaye mu mujyi wa Wilmington, muri leta ya Delaware, mu burasirazuba bw’igihugu. Ashinjwa ko ku bushake bwe atigeze yishyura guverinoma imisoro irenga amadolari 100,000 mu 2017 no mu 2018. Aregwa kandi gutunga imbunda mu gihe yari yarabaye imbata y’ibiyobyabwenge guhera mu 2015.
Abashinjacyaha bari bamaze umwaka bamukoraho anketi. Zaje kubyara amasezerano yo kwemera ibyaha. Yitabye urukiko kuko umucamanza agomba kuyaha umugisha.
Nibiramuka bibaye, Hunter Biden ntazaburanishwa, ashobora kutajya muri gereza, kandi no mu mwirondoro we, guverinoma ishobora kwemera kudashyiramo ko yakoze ibyaha akurikiranyweho.
Hunter Biden ni umwana wa kabiri wa Perezida Joe Biden. Ni umunyamategeko Afite imyaka 53 y’amavuko. (VOA/AP/Reuters)