Uburusiya bwatangaje ko buvuye mu masezeranso yarekurira Ukraine gushorera hanze ingano n'izindi ntete biciye mu bivuko biri kw'ibahari yirabura.
Ibi vyateye impungenge zikomeye cane ibihugu bikenye kurusha ibindi kw'isi.
Vyinshi muri vyo bisanzwe bigeramiwe n'ibiciro biri hejuru vy'ibintu ngenderwako, hamwe n'inkurikizi z'ihindagurika ry'ibihe.
Amasezerano arekurira Ukraine gushorera hanze ingano n’izindi ntete, yahagarikiwe n’ishirahamwe mpuzamakungu ONU na Turkiya mu kwezi kw’indwi mu mwaka w’i 2022, yarafashije kugabanya ibiciro vy’ibifungurwa mu makungu, yongera arekurira amashirahamwe y’abagiraneza kuronka amatoni ibihumbi amajana n’amajana y’ibufungurwa mu gihe abazikeneye bariko biyongera n’amafranga agenewe imfashanyo nayo yari agoye kuboneka.
Ku murwa mukuru wa Somaliya, Mogadisho, ibiciro vy’ingano vyiyongeye incuro zibiri igihe Uburusiya bwatera Ukraine, vyari vyagabanutse ku rugero rw’ica kane inyuma y’uko amasezerano yarekuriye Ukraine gushorera hanze ingano n’izindi ntete bicishijwe ku bivuko vyayo biri kw’ibahari yirabura ateweko igikumu.
Inyuma y’uko Uburusiya butangaje ko buvuye muri ayo masezerano, abantu bose, baba abacuruza ingano n’izindi ntete, abagushira imikate n’abasinzikajwe n’intambara, hamwe n’ingaruka z’uruzuba muri Somaliya bariko barumva ingaruka zavyo.
Halima Hussein, umuvyeyi w’abana 5, aba mw’ikambi iri ku murwa mukuru wa Somaliya, Mogadisho, y’abavanywe mu vyabo n’imyaka itari mike y’inkurikizi z’ibura ry’imvura n’ubwicanyi bw’intagondwa z’abayislamu, yatangaje ko batazi ukugene bazobandanya babaho.
Yavuze ko abagiraneza bariko bakora ibishoboka vyose kugira babafashe, ko yamara badafise uburyo buhagije bwo kubafasha.
N’ibihugu bitari bisanzwe bifise ibibazo bikomeye bishobora kwumva ingaruka z’ingingo Uburusiya bwafashe. Ibihugu nka Misiri vyarakura inyungu mu masezerano yarekurira Ukraine gushorera hanze ingano n’izindi ntete.
Misiri ni co gihugu kugirira hanze ingano nyinshi cane kurusha ibindi bihugu vyo kw’isi. Umushikiranganji ajejwe ibifungurwa muri ico gihugu yari yatangaje mu kwezi guheze ko yizeye ko ikiringo c’ayo masezerano kizokwongerezwa, kubera akamaro kayo ku vyerekeye gutuma amasoko mpuzamakungu adahungabana.