Abantu batatu nibo bimaze kumenyekana ko bamaze gupfa baguye mu myigaragambyo muri Kenya.
Ni imyigaragambyo yahamagajwe n’umunyapolitike, Raila Odinga, utavuga rumwe n’ubutegetsi. Baramagana izamuka ry’imisoro n’ibiciro ku masoko.
Muri iyo myigaragambyo yabaye kuri uyu wa Gatanu mu murwa mukuru Nairobi, polisi yakoresheje ibyuka biryana mu maso kugirango itatanye abigaragambya, inakumire abandi bantu bari baje muri icyo gikorwa baturutse mi mijyi ya Kisumu na Mombasa.
Na none kuri uyu wa Gatandatu, polisi yakoresheje ibyuka biryana mu maso mu gutatanya abagize sosiyete sivili basabaga ko abatawe muri yombi kubera iyo myigaragambyo bafungurwa.
Muri abo harimo Willy Mutunga wigeze kuba perezida w’urukiko rw’ikirenga.
Umunyamategeko Lempaa Suyianka yavuze ko bigayitse kubona polisi ikoresha ingufu n’ibyuka biryana ku bantu basaba ko inzirakarengane zifungurwa.Yavuze ko bamwe muri abo bafunzwe bakomeretse kandi bakeneye kwitabwaho n’abaganga byihutirwa.
Imiryango iharanira uburenganzira bwa muntu irimo Amnesty International, yamaganye ibyo yise ikoreshwa ry’ingufu z’umurengera rya polisi.
Dennis Onyango uvugira umunyapolitike Raila Odinga yavuze ko ihuriro ryabo rya Azimio riteganya gukomeza rikora imyigaragambyo nk’iyabaye kuri uyu wa Gatanu rimwe, buri cyumweru.
Odinga w’imyaka 78 yatsinzwe mu matora y’umukuru w’igihugu yabaye mu 2022. Akomeje kuvuga ko yibwe amajwi.