Muri Nijeriya, abantu bitwaje imbunda kuwa Kabiri bararashe imodoka y'ambasade ya Leta zunze ubumwe z'Amerika muri leta ya Anambra, mu majyepfo y'igihugu. Bishe abantu bane.
Nk’uko umuvugizi wa polisi, Tochukwu Ikenga, yabitangaje, abishwe ni abakozi babiri b’ambasade ariko b’abanyanijeriya n’abapolisi babiri. Yagize, ati: “Bamaze kubarasa, babatwikiye mu modoka” barimo.
Minisiteri y’ububanyi n’amahanga ya Leta zunze ubumwe z’Amerika yatangaje ko irimo ifatanya n’inzego z’umutekano za Nijeriya gukora anketi.
Guverinoma ya Nijeriya iratunga agatoki umutwe witwa “Indigenous People of Biafra,” ni nko kuvuga “Abasangwabutaka ba Biafra,” ko ari wo ushobora kuba wateze icyo gico. Urwanira ko igice leta ya Anambra nayo irimo cyitandukanya na Nijeriya kikaba igihugu gishya cyigenga.
Usibye gukoresha intwaro, bahora basaba na kamarampaka y’ubwigenge, ariko guverinoma ya Nijeriya irabyanga. Kuri yo, “ubumwe bwa Nijeriya ntibugibwaho impaka.”
Hagati aho, na none kuwa kabiri, abandi bantu bitwaje intwaro bishe abaturage 29 muri leta ya Plateau, mu majyaruguru ya Nijeriya. AP