Ousmane Sonko, umunyapolitike utavuga rumwe n’ubutegetsi muri Senegali mu kwezi gutaha azatangira kuburana ku cyaha aregwa cyo gufata umugore ku ngufu.
Ibi byemejwe n’umunyamategeko El Hadji Diouf, umwunganira. Uyu wiyamamarije umwanya w’umukuru w’igihugu mu matora yo mu 2019, muri iki gihe arakunzwe cyane n’abakiri bato.
Yamaze kandi gutangaza ko azongera akiyamamariza uwo mwanya mu matora yo mu mwaka utaha wa 2024.
Icyaha aregwa bivugwa ko yagikoreye muri salon aho yari yagiye gukorerwa masaje.
Sonko w’imyaka 48 ntiyemera iki cyaha avuga ko ari igihimbano kigamije gutambamira imigambi yo kwiyamamariza umwanya w’umukuru. Ashinja Perezida Macky Sall kuba inyuma y’ibyo.
Ifatwa rye mu 2021 ryateje imvururu n’imyigaragambyo yaguyemo abantu 12. Icyo gihe leta yamushinje guteza imvururu no kugumura abaturage.
Imiryango itandukanye iharanira uburenganzira bwa muntu ikomeje kuvuga ko ihangayikishije n’ibikorwa byo gukumira no kubangamira umudendenzo n’uburenganzira kuri bamwe.
Kugeza ubu, Prezida Sall ntaratangaza ko azongera kwiyamamariza umwanya w’umukuru w’igihugu.