Kuri uyu wa mbere, umushinjacyaha mukuru wa Kenya, yahagaritse ibirego ku badepite bane mu bijyanye n’imyigaragambyo irwanya guverinema, umunsi umwe nyuma y’uko umuyobozi utavuga rumwe n’ubutegetsi, Raila Odinga, ahagaritse imyigarambyo, nk’uko byavuzwe n’ababunganira mu mategeko.
Raila Odinga ejo ku cyumweru yavuze ko yiteguye kugirana ibiganiro na Perezida William Ruto, igihe cyose abayobozi bahagarika guta muri yombi no gukurikirana mu nkiko abafite aho bahuriye n’imyigaragambyo. Icyo ni kimwe mu byo yasabye.
Avoka, Danstan Omari, yabwiye ibiro ntaramakuru byo mu Bwongereza, Reuters ati: “Ikirego cyahagaritswe…ku bw’umutekano, ibiganiro n’ubutabera hagati y’abaregwa, na Leta.
Abadepite bane barimo abayobozi bo ku ruhande rwa Odinga mu mitwe yombi y’inteko ishinga amategeko, bari batawe muri yombi kandi bashinjwaga kuterana mu buryo bunyuranyije n’amategeko mu mpera z’ukwezi gushize kwa gatatu. Baje kurekurwa nyuma batanze ingwate.
Abantu ibihumbi bagize uruhare mu bikorwa bitatu byo gukora imyigaragambyo mu byumweru bibiri bishize, bamagana ubuzima buhenze, no kwiba amajwi mu matora yo mu mwaka ushize. Izo ncuro zose hajemo urugomo kandi indi myigaragambyo yari iteganyijwe kuri uyu wa mbere. (Reuters)