Leta y'u Rwanda imaze kurekura Bwana Paul Rusesabagina wari umaze imyaka hafi itatu afungiye mu Rwanda. Ni igikorwa cyabaye mw'ijoro ryo kuri uyu wa Gatanu tariki 24/03/2023.
Mw'itangazo Perezidansi y'Amerika yashyize hanze, Perezida Biden yumvikanishije ko ari ibyishimo kubona Rusesabagina arekuwe, akaba agiye kubana n'umuryano we.
Minisiteri y'ububanyi n'amahanga y'Amerika na yo ivuga ko ishimira abayobozi b'u Rwanda ku bushake bakoresheje mu kurekura Rusesabagina kugira ngo yongere guhuzwa n'umuryango we. Minisitiri w'ububanyi n'amahanga, Antony Blinken avuga ko Amerika yifuza u Rwanda rutekanye, rwatera imbere, kandi ko nta mwanya urugomo rwa politiki rukwiye kugira muri izo mpinduka.
Mw'itangazo yasohoye, ministri Blinken yashimiye kandi abayobozi b'igihugu cya Katari, bagize uruhare kugira ngo Rusesabagina arekurwe. Amakuru yashyizwe ahagaragara n'abakozi bo hejuru bo muri guverinoma y'Amerika ni uko ubu Rusesabagina ari mu maboko y'Ambasade ya Katari mu Rwanda. Azahamara igihe gito, ahave ajya i Doha muri Katari, nyuma azatahuke muri Leta zunze ubumwe z'Amerika.
Paul Rusesabagina yari yarakatiwe gufungwa imyaka 25, nyuma y'uko inkiko z'u Rwanda zimuhamije ibyaha bifitanye isano n'iterabwoba. Yari yajyanywe mu Rwanda, akuwe muri Katari, mu buryo imwe mu miryango y'uburenganzira bwa muntu yagereranije no "gushimuta", ku buryo yisanze yageze i Kigali atari yabiteganije mu mpeshyi ya 2020.