2023 ni umwaka w’amatora muri Republika ya demokrasi ya Kongo. Amashyirahamwe ya politike n’ayandi atandukanye ntabgo atekereza kimwe kubera ibibazo komisiyo y’amatora CENI igenda ihura nabyo harimo n’iky’umutekano muke uri hirya no hino mu ntara za Kivu ya ruguru na Ituri.
Niba abashigikira Perezida Tshisekedi batanga ikizere ku baturage, abandi harimo n’impunzi barashidikanya. Johnson Ishara uyobora ishyirahamwe ridashigikira ubutegetsi bwa Kinshasa LGD (Ladership pour la Bonne Gouvernance et le developpement) y’uwahoze ari ministri w’intebe Matata Ponyo we aravuga ko kwandika abaturage muri iki gihe, n’ibintu guverinoma ishaka kwitwaza kugirango hataba amatora mu duce tumwe tw’intara nk’uko byabaye mu matora ya 2018.
Amashyirahamwe ashigikira perezida wa republika yo afite ikizere kinini; aravuga ko ukwiyandikisha ni ukuvana umwijima mu bibazo bitandukanye byerekeye amatora Abanyekongo bari bafite.
Abavutse mu duce twa Rutshuru, Masisi no hirya no hino mu ntara zombi aho ari imirwano muri ibi bihe, ntabgo batekereza kimwe n’abanyapolitike.
Kuri bo, muri ibi bihe kuvuga ku kibazo ky’amatora muri Kongo bitari ngombwa. Hari ibindi bikenewe nk’uko Angelique Nyirasafari umwe mu bategarugori b’i Ngungu muri teritware ya Masisi yabibyiye radiyo ijwi ry’Amerika.
Lucha (lutte pour le changement), imwe mu mashyirahamwe arwanira impinduka,irasaba ku bwayo ko bitewe n’uko guverinoma ya Perezida Tshisekedi itabashije gukemura ikibazo ky’umutekano mu burasirazuba mu myaka yenda kugera kuri itanu,ibindi byemezo bikomeye bifatwe.
Komisiyo y’amatora CENI yatangiye kwandika abaturage kuva ku wa kane 16 gashyantare mu burasirazuba bw’igihugu. Ikibazo ky’impunzi kitarabona igisubizo, imirwano ya buri gihe hagati y’ingabo za leta na FARDC mu duce twinshi tw’intara; ibi ni bimwe bitera urujijo no gushidikanya ku matora yo mu kwezi kwa cumi na kabiri mu gihugu ca Kongo.