Mu Burasirazuba bwo hagati, imitwe y'abarwanyi bo mu ntara ya Gaza, muri Palestina, barashe ibisasu bya roketi muri Isirayeli. Indege z'intambara za Isirayeli nazo zahise zijya kurasa muri Gaza.
Igisirikare cya Isirayeli cyatangaje ko abanyapalestina bo muri Gaza barashe muri Israeli rokete esheshatu na misile ebyiri zihanura indege uyu munsi mu gitondo cya kare. Cyashwanyurije mu kirere rokete eshanu. Iya gatandatu yagiye igwa ahantu mu murima. Naho misile, nazo zayobye ntizagwa aho zagombaga kurasa. Nta muntu wapfuye, nta n’uwakomeretse.
Umutwe wo muri Palestina witwa Jihad Islamique (bishatse nko kuvuga ngo intambara ntagatifu ya Kislamu) usa n’aho wavuze ko ari wo warashwe muri Israeli kuko watangaje ngo “ufite uburenganzira bwo kwivuna ibitero bya Isirayeli.”
Indege z’intambara za Isirayeli nazo zagiye kurasa muri Gaza. Zibanze ku birindiro by’umutwe wa Hamas, uri ku butegetsi mu ntara ya Gaza, cyane cyane ikigo Hamas ikoreramo intwaro. Naho nta muntu wagize icyo aba.
Aka gatereranzamba gashya k’imirwano gateye impungenge amahanga. Misiri n’Umuryango w’Abibumbye barimo baragerageza gucubya umuhengeli. Bityo, intumwa yihariye ya ONU mu Burasirazuba bwo hagati, Tor Wennesland, yagiye i Gaza kuganira n’abayobozi ba Hamas.
Kurasana k’uyu munsi gukurikiye ukw’ejo hashize, aho abasilikare ba Isirayeli bateye mu mujyi wa Naplouse muri Cisjordaniya bashaka guta muri yombi abarwanyi bo mu mitwe yo muri Palestina.
Minisiteri y’ubuzima ya Palestina itangaza ko imirwano yabaye yahitanye abantu 11, abarwanyi batandatu n’abasivili batanu, barimo abasaza babiri b’imyaka 72 na 61, n’umusore w’imyaka 16. Abandi bantu 102 barakomeretse. Ku ruhande rw’ingabo za Isirayeli, nta n’umwe wagize icyo aba. Iyo minisiteri ivuga kandi ko kuva mu ntangiriro z’uyu mwaka w’2023, Isirayeli imaze kwica abanya-Palestina 66. Naho Isirayeli itangaza ko muri icyo gihe kimwe, imitwe y’abarwanyi yo muri Palestina imaze kwica abanya-Isirayeli 10 n’umukerarugendo umwe ukomoka muri Ukraine.