Senegali: Aminata Toure Avuga ko Azakomeza Urugamba

Aminata Toure, wahoze ari minisitiri w’intebe wa Senegali, yumvikanishije ko azakomeza uzugamba nyuma yo gukurwa ku mwanya w’ubudepite mu gihe ishyaka ritavuga rumwe n’ubutegetsi, rihakana guhiga abayobozi ba ryo, itora rya perezida ryo mu 2024 ryegereje.

Aminata Toure avuga ko atazahwema kurwanya kandidatire yo ku ncuro ya gatatu ya Perezida Macky Sall, ukomeje guceceka ku bijyanye n’icyo ashaka mu bireba itora rya perezida ryo mu mwaka utaha wa 2024. Madame Toure yabwiye serivisi y’Igifaransa y’Ijwi ry’Amerika ko umwanzuro w’inteko ishinga amategeko wo kumukura mu mwanya we muri iki cyumweru, ushingiye ku cyemezo cye cyo kuvuga ko adashyigikiye kandidatire ya Perezida Sall mu 2024. Manda ya kabiri ya perezida izarangira muri uwo mwaka.

Madame Toure yagize ati: “Ntekereza ko Perezida Macky Sall, atagombye kwiyamamaziza manda ya gatatu. Twembi twamamaje itegeko nshinga ryo mu 2016, rivuga neza ko nta muntu n’umwe ushobora kwiyamamariza manda zirenze ebyiri zikurikiranye”.

Toure yakunze kunenga cyane ishyaka riri ku butegetsi, yabereye umunyamuryango ukomeye, nyuma yo gushaka kuyobora inteko ishinga amategeko ntibikunde mu kwezi kwa cyenda. Yashinje Perezida Macky Sall, kuba yarananiwe kumushyigikira ngo agere kuri uwo mwanya, nyuma yo kuyobora ibikorwa byo kwiyamamaza mu matora y’abadepite mu kwezi kwa karindwi.

Yatangaje kandidatire ye mu matora ya perezida yo mu 2024, avuga ko Perezida Sall arimo gukomeza kugerageza kubuza abo batavuga rumwe nawe, kuziyamamaza muri iryo tora.

Ousmane Sonko, nawe watanze kandidatire ye mu itora rya perezida ritaha, arashinjwa ibyaha byo gufata ku ngufu kandi umucambanza yanzuye ko agomba kuzaburanishwa. Sonko, yahakanye ibyaha kandi yashimangiye mu kiganiro yagiranye n’Ijwi ry’Amerika kuwa mbere, ko nta kindi kibiri inyuma, uretse ubugambanyi bwa politiki bugamije kumubuza kwiyamamaza.

Yakomeje abwira Ijwi ry’Amerika kandi ati: “Macky Sall agomba kongera agatekereza. Perezida ntabwo avugira ku mugaragaro niba aziyamamaza cyangwa atazabikora. Abambari be bavuga ko ibibazo bya Sonko imbere y’amategeko, ari ibye ku giti cye, kandi ko guverinoma ntacyo biyirebaho”. (VOA News)