Abashinzwe ubuzima muri Afurika, kuri uyu wa kane bavuze ko icyorezo cya Ebola muri Uganda kiri hafi kurangira, mu gihe hashize iminsi 39 kuva hemejwe umurwayi wa nyuma wasanganywe virusi y’iyo ndwara mu gihugu.
Abategetsi mu kigo gishinzwe kurwanya no gukumira indwara muri Afurika CDC, bemeje bwa mbere icyorezo mu kwezi kwa 9 kandi bavuze ko yari Ebola Sudani, indwara itarabonerwa urukingo.
Mu kwezi gushize, Uganda yasezereye mu bitaro umuntu wa nyuma wari uzwiho Ebola. Perezida Yoweri Museveni kandi yakuyeho inzitiri zose zabuzaga abantu kuva mu bice bimwe bajya mu bindi. Gukuraho izo nzitizi byagaragazaga ko iyo ndwara yari imaze kugenza amaguru make.
Umuyobozi wa CDC, Ahmed Ogwell Ouma, yabwiye abanyamakuru ko nihatagira umurwayi mushya wa Ebola uboneka mbere y’italiki ya 10 y’uku kwezi kwa mbere, iyo ndwara izaba yacitse mu gihugu.
Yashimye guverinema ya Uganda ku ngamba nziza yahuje zafashije kubuza Ebola gukwirakwira, avuga ko byafashe iminsi 70 kugirango icyorezo giharikwe, ubwo hemezwaga ko abantu 142 bari bamze kwandura. Abahitanywe n’iyo ndwara ni 55. Ouma yongeyeho ko ubu urukingo rwa Ebola Sudani rurimo kugeragezwa.
Abashinzwe ubuzima muri Afurika bakoreye hamwe, bitegura guhangana n’icyorezo nyuma y’uko Ebola Zaire yari imaze gushegesha uburengerazuba bw’Afurika mu 2014-2016. Icyo gihe iyo ndwara yishe abantu 11,300, abenshi muri Gineya, Sierra Leone na Liberiya.
Ishami rya ONU ryita ku buzima OMS, ivuga ko igihugu kiba kigomba kumara iminsi 42 nta muntu wanduye, nyuma y’uko umurwayi wa nyuma yemejwe, kugirango bitangazwe ko indwara yacitse mu gihugu.
Reuters