Leta zunze ubumwe z'Amerika yafashe icyemezo cyo gupima Covid-19 abagenzi bose baturuka mu Bushinwa. Kuva leta y’Ubushinwa bukuyeho mu ntangiriro z’uku kwezi ingamba zikaze cyane yari yarashyizeho zo kwirinda Covid-19, abahanga n’abatagetsi mu byo kurwanya indwara zandura ku isi bemeza ko abantu byibura miliyoni imwe bayandura buri munsi. Bagaragaza impungenge cyane cyane ko bishobora kongera virusi nyinshi zihinduranyije, no gukwirakwira ku isi yose.
Ibihugu bitandukanye byatangiye gufata ingamba zo kubikumira. Ni nk’Ubuyapani, Koreya y’Epfo, Tayiwani, Maleziya, Ubutaliyani, n’Umuryango w’ubumwe bw’Ubur(ayi. Hiyongereyeho na Leta zunze ubumwe z’Amerika.
Itangazo ry’ikigo cy’ikigihugu gishinzwe gukumira no kurwanya indwara zandura rivuga ko guhera ku itariki ya 5 y’ukwezi kwa mbere kuje, abagenzi bose bafite guhera ku myaka ibiri y’amavuko baturuka mu Bushinwa, Hong Kong na Macao, n’abanyuze mu bindi bihugu ari ho bavuye, bagomba kwerekana icyemezo ko batanduye Covid-19 mbere kwemererwa kwinjira muri Leta zunze ubumwe z’Amerika. Bagomba kuba bipimishije bitarenze iminsi ibiri mbere yo gufata urugendo. Naho abagenzi bazaba baranduye iminsi icumi mbere yo kurira indege bagomba kwerekana icyemezo ko bakize neza. Ibi byemezo bireba n’Abanyamerika ubwabo. (AP)
Amerika Igiye Kuza Irapima Covid-19 Abagenzi Bose Baturuka mu Bushinwa
Zimwe mu ngenzi zo mu Bushinwa