Ku munsi wa 12 wa shampiyona y'umupira w'amaguru mu kiciro cya mbere mu Rwanda, ikipe ya Mukura Victory Sport yaciye agahigo ko kunyagira Marines FC ibitego 6 ku busa.
Ku wa gatanu hari hateganyijwe imikino ibiri. Mukura Victory Sport yakubise Marines FC itayibabariye kuko yayitsinze ibitego 6 byose ku busa mu mukino wabereye kuri Stade Umuganda i Rubavu.
Mu wundi mukino wabaye kuri uwo munsi ukabera kuri Stade ya Kigali i Nyamirambo, Gasogi United yanganyije na APR FC ubusa ku busa.
Ku wa gatandatu habaye imikino itatu. Kuri Stade Umuganda i Rubavu ikipe ya Police FC yatsinze Rutsiro FC ibitego bibiri ku busa. Ibyo bitego bibiri ku busa kandi ni byo Sunrise yatsinze Espoir FC kuri Stade Golgota i Nyagatare.
Ikipe ya AS Kigali yatsinze Kiyovu Sport ibitego 4 kuri 2 kuri Stade ya Kigali i Nyamirambo. Indi mikino itatu yari isigaye y'umunsi wa 12 wa shampiyona yabaye ku cyumweru. Kuri Stade ya Kigali i Nyamirambo Rayon Sport yatsinze Bugesera FC igitego 1 ku busa.
Mu mukino wabereye kuri Stade Ubworoherane i Musanze, ikipe ya Musanze FC yatsinze Rwamagana City ibitego 3 kuri 1. Mu wundi mukino, Etincelles FC yatsinze Gorilla FC igitego 1 ku busa kuri Stade Umuganda i Rubavu.
Kugeza ubu ku rutonde rw'agateganyo ku munsi wa 12 wa shampiyona amakipe akurikirana kuri ubu buryo:
1.Rayon Sport 25
2.AS Kigali 23
3.Kiyovu Sport 21
4.APR FC 20
5.Musanze FC 20
6.Police FC 20
7.Gasogi United 19
8.Mukura Victory Sport 17
9.Gorilla FC 17
10.Etincelles FC 16
11.Sunrise 15
12.Bugesera FC 14
13.Rutsiro FC 10
14.Rwamagana City 10
15.Espoir FC 7
16.Marines FC 5
Ino nkuru yateguwe n'Umunyamakuru w'Ijwi ry'Amerika, Jean Claude Munyandinda.