Ebola Ikomeje Gukwiragira muri Uganda

Uganda iryamiye amajanja mu gihe Ebola ikomeje gukwirakwira. Ishami rya ONU ryita ku buzima, OMS, riratangaza ko virusi ya Ebola, ubu yakwirakwiriye mu ntara umunani za Uganda, harimo n’umurwa mukuru Kampala, utuwe cyane.

Iyo ndwara y’icyorezo itera kuvirirana kandi yica, yavumbuwe mu mpera z’ukwezi kwa cyenda. Imibare iheruka gutangazwa na OMS y’abarwayi bemejweho iyo ndwara n’abayikekwaho, muri Uganda ni 157. Harimo 52 byemejwe ko bishwe na Ebola na 21 bikekwa. Ibi byatumye umubare w’abahitanywe na Ebola ugera hafi kuri 40 kw’ijana.

Igihugu cya Uganda, kirimo kubona ubwandu bwa Ebola bwo mu bwoko Ebola Sudani bwiyongera. Ni indwara idafite urukingo rwo kuyibuza gukwirakwira.

Cyakora OMS itangaza ko inkingo eshatu byagaragaye ko zishobora gukoreshwa mw’igeragezwa muri Uganda. Nta tariki yatanzwe y’igihe ibyo byatangirira

Kw’itariki ya 1 y’uku kwezi kwa 11, OMS yongeye gusuzuma ibijyanye na Ebola muri Uganda, iyishyira ku rwego ruri hejuru cyane, iyikuye kurwo hasi, ku gipimo cy’akarere. Cyakora yasanze ibyago byo gufatwa n’iyo ndwara, bikomeje kuba hasi, ku rwego rw’isi.

Abayobozi bashinzwe ubuzima bavuga ko kubasha guhagarika icyorezo, bishingiye ku rukomatanye rw’ibikorwa. Hari uruhare rukomeye rw’abaturage ruza kw’isonga.

Abo bayobozi basanga, kugirango icyorezo cya Ebola gihagarare, abaturage bagomba kwemera ko icyorezo gihari, bakabigiramo uruhare kandi bagatanga igisubizo. Abaobozi banavuga ko ibikorwa byumvikanyweho, birimo gukoreshwa kugirango abaturage bagane amavuriro igihe bafite ibimenyetso kandi hakurikizwe uburyo bwo kumenya uwahuye n’umurwayi.

Janet Diaz, umuyobozi wa programu ya OMS, mu bijyanye n’ubuvuzi bw’ibihe bikomeye, akubutse muri Uganda aho yamaze icyumweru areba uko ibintu byifashe, anasuzuma ibikenewe n’ibigo by’ubuzima mu turere turimo indwara ya Ebola.

Iyi mpuguke Diaz, avuga ko OMS irimo gufasha minisiteri y’ubuzima ya Uganda, kubona ibindi bitanda. Iri shami rya ONU irimo no gufasha kwubaka ahantu byibura hatatu, hakwakirirwa abarwayi bashya. Uyu muyobozi anavuga ko inzobera za OMS zirenga 80 ziri muri Uganda, aho zifasha abakozi mu bijyanye n’uburwo buboneye bwo kwita ku barwayi. Ikindi avuga ni uko, amahugurwa ku rwego rwaguye, arimo gukorwa ku birebana n’ubwandu bwa Ebola, haba mu bijyanye no kubukumira no kubuza indwara gukwirakwira. (VOA News)