Muri Angola, abaturage biriwe mu matora y'inteko ishinga amategeko, azavamo n'uzaba umukuru w'igihugu. Ishyaka UNITA rirashaka kwambura ubutegetsi irya MPLA ribumaranye imyaka 47.
Abaturage hafi miliyoni 15 bari bariyandikishije kugirango bashobore gutora. Abaturage bose hamwe b'Angola ni miliyoni 33.
Ibiro by'amatora ubu bimaze gufunga. Byibura amasaha abiri mbere y'uko bifungura mu gitondo, saa moya ku isaha ya Luanda, hamwe na hamwe bari batangiye gutora imirongo. Amasoko n'amaduka yiriwe afunze kugirango abaturage benshi bashoboka bajye gutora. Guverinoma yari yasabye kandi n'abakoresha guha abakozi babo umwanya wo kujya gutora.
Perezida Joao Lourenço, w'imyaka 68 y'amavuko, kandida wa MPLA, arashaka manda ya kabiri. We n'uwo bahanganye, Adalberto Costa Junior w'imyaka 60, akaba kandida wa UNITA, bombi batoreye mu gitondo mu murwa mukuru, Luanda, ariko mu biro bitandukanye. Uretse bo, andi mashyaka mato mato atandatu nayo ari mu matora. Kandida w'irizatsindira inteko ishinga amategeko ni we uzaba umukuru w'igihugu. Ntibiramenyekana igihe Komisiyo y'amatora izatangariza amajwi.
Abahanga mu bya politiki babikurikirira hafi bemeza ko aya matora ari aya mbere UNITA irimo irya isataburenge cyane ikigugu MPLA, iri ku butegetsi kuva Angola ibonye ubwigenge mu 1975.
MPLA ifite indorerezi 53,000 zayo bwite zo gukurikirana amatora n'ibarura ry'amajwi. Naho UNITA yo ntiyigeze ishyira ahagaragara uburyo igomba kuyakurikirana, ahubwo yasabye abayoboke bayo kwicara ku biro by'amatora kugirango bakurikirane ubwabo uko amatora akorwa n'ibarura ry'amajwi, no kugenda batangaza imibare.
Naho amahanga yohereje indorerezi 2,000, baturutse by'umwihariko mu Muryango w'Ubumwe bw'Afrika, Umuryango w'iterambere ry'ibihugu byo mu karere k'Amajyepfo y'Afrika (SADC), Umuryango w'Ubumwe bw'Ubulayi, no mu Muryango w'ihugu bihuriye ku rurimi ry'Igiportugal.