Urubanza rwa Sepp Blatter na Michel Platini, bahoze mu buyobozi bw'umupira w'amaguru ku isi, rwatangiye uyu munsi mu Busuwisi. Mu byaha baregwa harimo ibya ruswa.
Abashinjacyaha bavuga ko Blatter na Platini bafatanyije kuyobya no kugabana amadolari arenga miliyoni ebyiri mu 2011. Bo barabahikana. Urubanza ruzamara ibyumeru bibiri kugera ku itariki ya 22 y'uku kwezi, ariko abacamanza bazarusoma ku itariki ya 8 y'ukwezi gutaha. Ibyaha biramutse bibahamye, Blatter na Platini bashobora guhanishwa kugera ku myaka itanu y'igifungo.
Umusuwisi Sepp Blatter, ubu w'imyaka 86 y'amavuko, yabaye perezida utavugirwamo wa FIFA igihe cy'imyaka 17, kuva mu 1998 kugera 2015. Yeguye kubera ibirego bya ruswa no gukoresha nabi amafaranga y'ishyirahamwe.
Umufaransa Michel Platini afite imyaka 66 y'amavuko. Yabaye icyamamare ku isi mu bakinnyi b'umupira w'amaguru. Yabaye perezida wa UEFA (ishyirahamwe ry’umupira w’amaguru mu Burayi) kuva mu 2007 kugera mu 2015.
Muri icyo gihe, yari n'umwe mu bajyanama ba Blatter muri FIFA. Ibirego bibari hejuru bombi byatumye Platini atakaza amahirwe yo gusimbura Blatter nk'uko yabyifuza. Hagati aho, ibi birego byatumye FIFA ica Platini mu birebana n'umupira w'amaguru ku isi byose kugera umwaka utaha.