Muri Pakistani, kuri uyu wa Kabiri ni bwo guverinoma nshya iyobowe na Ministiri w'Intebe Shehbaz Sharif yarahiye. Isimbuye iya Imran Khan wakuweho icyizere n'inteko ishinga amategeko nyuma y'imyaka ine yari amaze ku butegetsi.
Ni guverinema igizwe n’abaministiri 37 n’abajyanama. Umuhango wayobowe na perezida w’agateganyo Sadiq Sanjrani ukaba witabiriwe na ministiri w’intebe Sharif n’abandi bayobozi bakuru bo mu ishyaka rye ya Pakistan Muslim League-Nawaz.
Sharif watorewe gusimbura Imran Khan mu cyumweru gishize, yagiye mu bufatanye n’andi mashyaka arimo n’ishyaka risanzwe rihanganye ni rye rya PPP mu buryo bwo kubaka ubwiganze mu nteko ishinga amategeko.
Uwo yasimbuye ku mwanya wa ministiri w’intebe Imran Khan w’imyaka 69 amaze iminsi akoresha imyigaragambyo hirya no hino mu gihugu isaba ko hakorwa amatora yihutirwa.
Ashinja Leta zunze ubumwe z’Amerika gukorana n’amashyaka ataravugaga rumwe na leta ye mu kumuhirika ku butegetsi. Avuga ko azira ko yasuye Uburusiya bugitangira kugaba ibitero ku gihugu cya Ukraine.
Ibyo birego bye bimaze kwamaganwa na Leta zunze ubumwe z’Amerika na ministiri w’intebe mushya wa Pakistan Shehbaz Sharif.