Umushikiranganji wo kumenyeshamakuru muri Republika ya Demokarasi ya Kongo yatangaje ko abantu 75 bahitanywe n’isanganya ya Gari ya Moshi hamwe n’125 bakomeretse.
Iyo Gari ya Moshi yahenutse mw’ijoro ryo ku musi wa kane yari ivuye ahitwa Luena mu ntara ya Lomami ija mu gisagara kirimwo ubure bwinshi citwa Tenke, hafi y’igisagara Kolwezi giherereye mu bumanuko bushira ubuseruko bwa Kongo.
Iyo Gari ya Moshi ubundi yagenewe gutwara ibidandaza, ariko abarenga ijana bari bayirimwo binyuranye n’amategeko.
Ibikorwa vyo kurondera abandi boba bayiguyemwo batahuse baboneka ibiziga biracabandanya. Igisata c’ukunguruza abantu n’ibintu kikavuga ko umwanya n’umwanya igitigiri c’abaguye muri iyo sanganya ciyongera.