Abaturage bo mu majyepfo ya Iraki baramukiye mu myigaragambyo yo kwamagana izamuka ry'ibiciro by'ibiribwa abategetsi bavuga ko rikomoka ku ntambara ibera muri Ukraine.
Hashize icyumweru igiciro cy'amavuta yo guteka n'ifu kizamutse ku masoko yo muri icyo gihugu ku rugero rwo hejuru cyane. Abategetsi bashyizeho amabwiriza bagerageza guhangana n'ikibazo cy'uburakari bw'abaturage bukomeje kwiyongera kubera iri zamuka ry'ibiciro.
Abaturage bagera kuri 500 bakoraniye ku rubuga mberabyombi rw'umujyi wa Nasiriyah, aho bahuriye mu mwaka wa 2019 mu myigaragambyo yo kurwanya ruswa.
Ejo ku wa kabiri Leta yashyizeho ingamba zigamije guhangana n'izamuka ry'ibiciro ku rwego mpuzamahanga harimo gutanga $70 ku bari mu kiruhuko cy'iza bukuru batinjiza arenze $700 cyangwa abari mu kazi batarenza $350.
Ubutegetsi kandi bwakuyeho imisoro ku biribwa n'ibindi bikoresho by'ibanze kumara igihe cy'amezi abiri. Ministeri y'ubutegetsi bw'igihugu yavuze ko yataye muri yombi abacuruzi 31 baregwa kuzamura ibiciro by'ibiribwa mu buryo bukabije ku baturage.
Ministri w'ubucuruzi, Mohamed Hanoun, yavuze ko iri zamuka ry'ibiciro riterwa n'intambara ibera muri Ukraine. Ibihugu byinshi byo mu burasirazuba bwo hagati byakuraga ibiribwa birimo amavuta y'ibihwagari n'ingano mu Burusiya na Ukraine.