Urukiko rusesa imanza rw'Ubufaransa rwaciye iteka ko dosiye y'iraswa ry'indege y'uwahoze ari umukuru w'igihugu cy'u Rwanda, Juvenal Habyarimana, ifungwa burundu. Thomas Kamilindi aragaruka kuri iyi dosiye yari yarangije umubano w'u Rwanda n'Ubufaransa.
Mu mugoroba wo kw'itariki ya 6 y'ukwa kane 1994, umukuru w'igihugu cy'u Rwanda, Juvenal Habyarimana, yari avuye mu nama na bagenzi be bo mu karere i Dar Es Salaam mu Tanzaniya. Mu ndege yari imucyuye harimo na perezida w'Uburundi, Cyprien Ntaryamira, na bamwe mu baminisitiri n'abajyanama bari babaherekeje. Indege iri hafi kugera ku kibuga mpuzamahanga cy'i Kanombe yarashwe na misile ikiri mu kirere, irashwanyuka, abari bayirimo bose uko ari 12 barapfa. Barimo abaderevu bayo batatu bose b'Abafaransa. Abayirashe ntibigeze bamenyekana.
Mu 1998, imiryango y'abaderevu yaregeye ubutabera bw'Ubufaransa "icyaha cy'ubuhotozi gishamikiye ku mugambi w'iterabwoba." Ariko bareze X kuko batazi uwarashe indege. Uwari umukuru w'urwego rw'ubugenzacyaha, Jean-Louis Bruguière, yatangiye anketi muri uwo mwaka mu kwezi kwa gatatu, noneho mu kwezi kwa 11 mu 2006, yemeza ko abantu icyenda bo muri FPR-Inkotanyi bagize uruhare mu iraswa ry'indege ya Habyarimana, asohora impapuro zo kubata muri yombi.
Muri bo twavuga nka General James Kabarebe, General Charles Kayonga, cyangwa Lieutenant-Colonel Rose Kabuye. Bruguière yanditse kandi ko na perezida w'u Rwanda, Paul Kagame, akurikiranwa n'urukiko mpuzamahanga mpanabyaha rwari i Arusha muri Tanzaniya. Kuri we, inkiko z'Ubufaransa ntizishobora kumukurikirana kubera ubudahangarwa bwe bw'umukuru w'igihugu.
U Rwanda rwahise ruca umubano n'Ubufaransa, rufunga ambasade y'Ubufaransa y'i Kigali, rwirukana n'abadipolomate bayikoreraga. Ibihugu byombi byongeye gusubukura umubano nyuma y'imyaka itatu, mu 2009.
Hagati aho, umucamanza Bruguière yagiye mu kiruhuko cy'iza bukuru, asimburwa na Marc Trévidic na Nathalie Poux. Bo bagiye gukora anketi no mu Rwanda, ibyo Bruguière atari yarakoze. Baciye umwanzuro ko indege ya Habyarimana yashwanyujwe na misile yarasiwe mu kigo cy'ingabo z'igihugu (ingabo Habyarimana yari abereye umugaba w'ikirenga icyo gihe) cy'i Kanombe.
Mu kwezi kwa 12 mu 2017, Jean-Marc Herbaut na Nathalie Poux batangaje ko barangije anketi zabo, ko dosiye bayipfundikiye. Ku itariki ya 21 y'ukwa 12 mu 2018, batangaje ko bafashe umwanzuro wo gufunga dosiye, bavuga ko badafite ibimenyetso bifatika ku baregwa icyenda bo muri FPR-Inkotanyi.
Imiryango y'abaguye mu ndege yarajuriye. Mu kwezi kwa karindwi 2020, urugereko rw'ubugenzacyaha rw'urukiko rw'ubujurire rw'i Paris rwahaye ukuri abagenzacyaha, rushimangira icyemezo cyabo cyo kuri ku itariki ya 21 y'ukwa 12 mu 2018.
Imiryango y'abaguye mu ndege nabyo yarabijuririye mu rukiko rusesa imanza, ari narwo rwo hejuru y'inkiko mu nzego z'ubutabera z'Ubufaransa. Narwo rwateye utwatsi icyifuzo cyabo, narwo ruvuga ko nta bimenyetso bifatika biri muri dosiye.
Maître Léon Lef Forster na Maître Bernard Maingain, abavoka bunganira abo umugenzacyaha mukuru Jean-Louis Bruguière yashakaga gukurikirana, bishimiye iteka ry'urukiko rusesa imanza rw'Ubufaransa. Mu itangazo rimwe bashyizeho umukono bombi, bavuga ko ari "intsinzi y'ubutabera."
Umuvugizi wa leta y'u Rwanda, Yolande Makolo, nawe yabyishimiye. Mu nyandiko yashyize kuri Twitter mu Cyongereza, aragira, ati: "Icyemezo cy'urukiko rusesa imanza rw'Ubufaransa kirangije ikinyoma cya mbere gikomeye mu mateka."
Icyemezo cy’urukiko rw’Ubufransa gifashwe mu gihe perezida w’u Rwanda Paul Kagame ari mu Bufransa. Ku ruhande rwe, Perezida Emmanuel Macron w’Ubufransa yasuye u Rwanda mu kwezi kwa Gatanu umwaka ushize wa 2021. Ni rwo ruzinduko rwa mbere rwari rukozwe n’umukuru w’igihugu cy’Ubufransa mu Rwanda kuva mu mwaka w’2010.