Senegali izajugunya inkingo za COVID-19 ibihumbi magana ane mbere y’impera z’uyu mwaka. 200.000 zarengeje igihe zidakoreshwa mu mezi abiri ashize. Izindi 200.000 nazo zizaba zataye igihe bitarenze ukwezi kwa 12 kubera ko abazisaba ari bake cyane. Umuyobozi wa progaramu y’ikingira yabivuze uyu munsi kuwa mbere.
Guverinema zo muri Afurika zakunze gusaba izindi nkingo za COVID-19 kugirango zibashe kugera ku rwego rw’ibihugu bikize kw’isi, aho ibikorwa byagenze neza igihe kirenga umwaka.
Ariko n’ubwo inkingo zabonetse cyane mu byumweru bishize, ibihugu bimwe ntibyabashije kugendana n’uwo muvuduko. Ibibazo by’ibikoresho, igihe gito inkingo z’abaterankunga zabaga zishigaje, hakiyongeraho ukugingimiranya, byose byatumye doze z’inkingo zitagera ku bazikeneye.
Inkingo za COVID-19 zarengeje igihe muri Nijeriya mu kwezi gushize. Ibyo byashyizwe ahagaragara n’ibiro ntaramakuru byo mu Bwongereza Reuters.
Ikibazo nyamukuru ni ukugingimiranya nk’uko Ousseynou Badiane, ushinzwe gutanga inkingo muri Senegali abivuga. Ati: “Umubare w’abandura uragabanuka. Barabaza ngo: “Kuki byaba ngombwa kwikingiza niba indwara idahari”?
Senegali yabaruye abantu barenga 74.000 COVID-19 barwaye COVID na 1.886 bapfuye. Ni umubare muto ugereranyije no mu bindi bihugu byinshi byibasiwe na Virusi. Ubwandu bwaragabanutse kuva inkubiri ya gatatu irangiye mu kwezi kwa karindwi yatumye hikingiza benshi. Hari ubwo iki gihugu kitabona n’umuntu umwe wanduye ku munsi.
Senegali yatanze hafi doze miliyoni ebyiri kugeza ubu. Imibare itangazwa n’ibiro ntaramakuru Reuters, ivuga ko zihagije mu gukingira mu buryo bwuzuye, hafi 5 kw’ijana gusa by’abaturage.
Ubu harakingirwa hagati y’igihumbi n’ibihumbi bibiri ku munsi. Umuyobozi ushinzwe inkingo muri Senegali, Badiane yabibwiye Reuters ko bavuye ku 15.000 mu mpeshyi. Avuga ko kuri urwo rugero, badashobora gukoresha inkingo zose bafite.
Yagize ati: “Nta cyizere dufite cy’uko tuzakoresha doze 200.000 mbere y’uko zirenza igihe mbere y’impera z’ukwezi. Ntabwo twiteze ko abazisaba baziyongera mbere yaho”.
Ntiyavuze ubwoko bw’izo nkingo ziri hafi gutakaza igihe.
Kimwe mu bitera ikibazo, ni igihe gito izo nkingo ziba zishigaje kumara, nyuma yo kugera mu gihugu ziturutse ku baterankunga barimo Leta zunze ubumwe z’Amerika n’Ubushinwa. Senegali yanze gufata inkingo zidashobora kumara amezi byibura atatu mbere y’uko zirenza igihe, n’ubwo ibyo nabyo biteza ibibazo.
Umuyobozi Badiane, yizeye ko guverinema izabasha gushyiraho zimwe mu nzitizi ku bantu batikingije, kugirango umubare w’abazihabwa wiyongere, harimo icyangombwa cy’ubuzima nk’uko ibindi bihugu byinshi byabikoze kugeza ubu.
Avuga ko “Hatariho inzitizi, abaturage batazikingiza”.
Reuters