Dusangire Ijambo

Mu Gisagara ca Bujumbura no hagati mu Burundi hamaze iminsi hibonekeza umutekano muke. Intandaro ni abantu bataramenyekana batera amagerenade mu bibanza bihurirwamwo n’abantu benshi. Reta yagiriza bamwe mu batavuga rumwe na yo kuba bari inyuma y’ivyo bitero. Aba nabo barabihakana ahubwo bakikeka ko ari bamwe mu bagize inzego za reta bashaka kuburabuza ubutegetsi bwa Perezida Evariste Ndayishimiye. Ico bikoze, bamwe mu banyagihugu baganiriye n’Ijwi ry’Amerika bemeza ko bafise ubwoba kubera ivyo bitero, ndetse bakavuga ko hari ibikorwa vyo ku mugoroba bahevye ku gutinyira umutekano wabo.