Reta ya Nijeri ivuga ko abagabo bitwaje inkoho bateye umugwi w’abantu bari bavuye mw’isoko, bica 58. Ico gitero co ku musi wa mbere cabereye mu ntara yamamwo imidugararo ya Tillaberi, aho abantu 100 bishwe mu rukurikirane rw’ibitero mu kwezi kwa mbere.
Nta washotse yiyitirira ubwo bwicanyi bwo kuwa mbere, ariko imihari y’intagondwa ishamikiye ku muhari wa reta ya kiyisilamu mu karere ka Sahara ni yo izwi ko ikorera muri ako karere.
Abantu bishwe bari batahutse bavuye mw’isoko ry’ibitungwa mu gisagara ca Banibangou, hafi y’urubibe na Mali. Abo bakekwa gukora ubwo bwicanyi barasambuye amabutike y’ibiribwa.
Iryo tangazo ryasomwe kuri uyu wa kabiri kuri televiziyo ya reta n’umuvugizi wa reta, Abdourahmane Zakaria, kandi yatangaje imisi itatu reta yashizeho yo kugandarira abishwe.