Perezida Donald Trump yatangaje itegeko rya perezida kuri uyu wa kabiri rishira abanyamerika aba mbere bakwiye guhabwa incanco za Covid-19.
Ni mu gihe perezida yatowe, Joe Biden yagabishije ko utwigoro two gucandaga abanyamerika dushobora guteba mu gihe abashingamateka batotanga uburyo bw’amafaranga akenewe kugira bishoboke. Biden yabishikirije igihe yariko arerekana abategetsi bazomufasha muri reta mu gisata c’amagara y’abantu.
Ntibiramenyekana nimba iryo tegeko rya perezida Trump ryo gucandaga ubwa mbere abanyamerika rishobora kutazohura n’intambamyi mu butungane, mu gihe amakompanyi akora imiti aza yaramaze gusinyiranira amasezerano n’ibindi bihugu.
Ariko bisa nuko ibiro vya perezida, White House bifise amakenga nimba hazoboneka incanco zikenewe reta yiyemeje ko abanyamerika imiliyoni 100 bazoba bacandazwe gushika mu mpera z’ukwezi kwa kabiri hamwe n’igihugu cose mu kwezi kwa gatandatu.