Minisitiri w'intebe w'Ubwongereza, Boris Johnson, yishyize mu kato k'ibyumweru bibiri amaze kumenya ko aherutse guhura n'umuntu wanduye virusi ya Corona.
Boris Johnson yatangaje mu mashusho ya videwo kuri Twitter ko ameze neza, nta bimenyetso bya virusi ya Corona afite. Yagize ati: "Ndakomeye rwose." Gusa, Johnson azajya akorera iwe mu rugo mu gihe cy'iminsi 14.
Johnson yishyize mu kato akurikije inama z'ikigo cy'igihugu gishinzwe gusuzuma indwara, cyabonye ko hari umudepite bagiranye inama y'iminota 35, kuwa kane ushize, wanduye virusi ya Corona.
Minisitiri w'intebe w'Ubwongereza yarwaye Covid-19 mu kwezi kwa gatatu gushizwe, aravurwa, arakira, nyuma y'ukwezi yamaze mu bitaro by'indembe.
Hagati aho, virusi ya Corona yaba yarageze mu Butaliyani mu kwezi kwa cyenda k'umwaka w'2019. Bivuze ko yaba yaravuye mu Bushinwa mbere cyane kurusha uko bizwi. Bitarangazwa n'ikigo cy'ubushakashatsi ku ndwara ya kanseri cyo mu mujyi wa Milan, mu majyaruguru y'Ubutaliyani.
OMS (ishami ry'Umuryango w'Abibumbye ryita ku buzima) yemeza ko virusi ya Corona itari izwi mbere y'uko yaduka mu mujyi wa Wuhan, mu Bushinwa rwagati, mu kwezi kwa 12 k'umwaka ushize.
Kugeza ubu, nk'uko OMS ibivuga, Covid-19 imaze kwanduza abantu barenga miliyoni 47 no kwica abandi barenga miliyoni imwe kw'isi yose.