Muri Etiiopiya, Komisiyo y'igihugu y'uburenganzira bwa muntu iramagana ifungwa ry'abanyamakuru. Ni mu gihe intambara yo mu ntara ya Tigré igenda irushaho gukaza umurego.
Daniel Bekele, umuyobozi wa komisiyo y'uburenganzira bwa muntu yashyizweho na guverinoma avuga ko abanyamakuru babiri b'ibinyamakuru byigenga batawe muri yombi. Ati: "Turasaba leta kubahiriza uburenganzira bwabo n'inzira zose zemewe n'amategeko ku byaha by'itangazamakuru baregwa."
Umuryango mpuzamahanga CPJ uharanira uburenganzira bw'abanyamakuru, ufite icyicaro gikuru i New York muri Leta zunze ubumwe z'Amerika, wo watangaje ko gufata aba banyamakuru ari "intambwe mbi isubira inyuma mu nzira leta ya Etiuopiya yari imaze kugeramo yo guteza imbere ubwisanzure bw'itangazamakuru."
Komisiyo ya Etiyopiya na CPJ bafite impungenge ko abanyamakuru bakomoka muri Tigré bashobora kwibasirwa. Ariko leta ya Etiyopiya ntisobanura niba aba banyamakuru nabo baratawe muri yombi kubera ko bakekwaho kuba ibyitso by'ingabo z'intara ya Tigré, aho intambara ica ibintu.
Ibigo ntaramakuru bitandukanye, nka Reuters yo mu Bwongereza na AP yo muri Leta zunze ubumwe z'Amerika, byemeza ko indege z'intambara za Etiyopiya zimaze kwica abantu amagana.
Abaturage ibihumbi barimo barahungira buri munsi muri Sudani, ituranye n'intara ya Tigré. Leta ya Sudani iravuga ko yiteze kwakira abagera ku bihumbi 200 muri iyi minsi iri imbere
Umuyobozi w'ibikorwa by'ubutabazi byihutirwa by'Umuryango w'Abibumbye, Sajjad Mohammad Sajid, yatangarije AP ko abahunga bakeneye bwa mbere na mbere amazi n'ibiribwa. Ariko na none, ati: "Abaturage ba Tigré bagera kuri miliyoni ebyiri, barimo ibihumbi amagana bamaze kuva mu byabo, bari mu bihe bikomeye cyane, wongereho ko bikomeye pe!"
Hagati aho, abanyamahanga barenga igihumbi, cyane cyane ba mukerarugendo, bagotewe muri Tigré n'intambara. Ibihugu bakomokamo birasaba impande zombi zirwana kubimerera kuhabakura bidatinze. Ibibuga by'indege byo Tigré ubu byose birafunze. Internet ntikora, na banki zirafunze, nk'uko Sajid abisobanura.