Abanyamerika babiri, Paul Milgrom na Robert Wilson, ni bo bahawe igihembo Nobel mu by'ubukungu.
Paul Milgrom afite imyaka 72 y'amavuko. Naho Robert Wilson afite 83. Bombi bigisha muri kaminuza Stanford, imwe muri kaminuza eshanu zikomeye ku isi. Ifite icyicaro gikuru muri leta ya California. mu burengerazuba bwa Leta zunze ubumwe z'Amerika.
Komite Nobel yabahembeye ubushakashatsi bakoze ku masoko ya cyamunara n'ukuntu bwahinduye imikorere yayo. Iragira, iti: "Cyamunara uzisanga hose mu buzima bwacu bwa buri munsi. Ubushakashatsi bwabo bwabereye ingirakamaro kanini abagura, abagurisha, na sosiyete yose muri rusange."
By'umwihariko, Paul Milgrom na Robert Wilson ni bo bahimbye uburyo bwo kugurisha impushya zo gukoresha imirongo yo mu itumanaho muri Leta zunze ubumwe z'Amerika, nka bimwe mujya mwumva ngo turavugira ku mirongo migufi tuvuge. Ni bo kandi bize uburyo bwo gukoresha imihanda y'indege iyo zigiye kugwa ku bibuga byazo.
Igihembo Nobel mu by'ubukungu ni cyo gitangazwa nyuma y'ibindi byose. Gikurikirana n'icy'amahoro kuwa gatanu ushize cyahawe PAM, ishami ry'Umuryango w'Abibumbye ryita ku biribwa.
Kubera icyorezo cya virusi ya Corona, imihango yo gushyikiriza mu biganza byabo abantu bahawe ibihembo Nobel byose muri uyu mwaka ntizaba uko bisanzwe ku italiki ya 10 y'ukwa 12 i Stockholm, umurwa mukuru wa Suede, na Oslo, umurwa mukuru wa Norvege ku cy'amahoro. Bose bazabyakirira mu bihugu byabo.