Abavoka bunganira Paul Rusesabagina mu mategeko bavuga ko leta y'u Rwanda ishobora kumukoraho iyicarubozo.
Nk'uko tubikesha ikigo ntaramakuru AP, abunganira Rusesabagina bandikiye intumwa yihariye y'Umuryango w'Abibumbye ushinzwe gukurikirana ibyaha by'iyicarubozo, Umusuwisi Nils Melzer. Bamubwira ko leta y'u Rwanda yangiye Rusesabagina kubonana n'abanyamategeko, no gusurwa n'umuryango we n'abadipolomate. Barasaba Melzer kwihutira gukora anketi kugirango "bamenye neza niba Rusesabagina akiriho."
Mu rwandiko rwabo, abunganira Rusesabagina bavuga ko ashobora gukorerwa iyicarubozo, n'ibindi bitesha agaciro-muntu, bati: "Nk'uko polisi y'u Rwanda n'abashinzwe za gereza babimenyereye ku bandi."
Muri urwo rwandiko, abunganira Rusesabagina basaba kandi na leta ya Emira z'Abarabu zunze ubumwe kwerekana ko nta bufatanye yagize mu ifatwa rya Paul Rusesabagna. Bityo, bati: "Iyi leta igomba gutanga ibirebana byose n'urugendo yarimo i Dubai, birimo amashusho amwerekana ari muri hoteli, ku kibuga cy'indege, n'ibirebana n'indege yamutwaye i Kigali."
AP yemeza ko na CICR, Komite mpuzamahaganga w'umuryango w'ubutabazi Croix-Rouge itarashobora kugera kuri Rusesabagina. Ariko AP ntisobanura niba CICR yarabisabye leta y'u Rwanda.
Ku itariki ya 31 y'ukwezi gushize ni bwo RIB, Urwego rw’Igihugu rw’Ubugenzacyaha mu Rwanda, rwerekanye Paul Rusesabagina ari mu mapingu. Yo n'ubushinjacyaha ntibaratangaza igihe bazamugeza imbere y'umucamanza. Mu byaha Rusesabagina aregwa harimo iterabwoba.
Naho ku birebana n'abamwunganira mu by'amategeko, Me Rugaza David yatangaje ko ari we avoka wa Rusesabagina. Abandikiye ONU babiteye utwatsi. Bavuga ko leta y'u Rwanda ishaka guha Rusesabagina "avoka w'umutsindirano, kuko atamwihitiyemo n'umuryango we nawo utabizi."
Itsinda ry'abunganira Rusesabagina rigizwe n'abavoka barindwi, barimo Umunyarwanda Me Gatera Gashabana. Abandi ni abanyabulayi n'Amerika.