Abahuza bo mu bihugu byo mu Burengerazuba bw’Afurika mu muryango wa CEDEAO, babwiye abasilikare bakoze kudeta muri Mali ko bashobora kwemera guverinema y’inzibacyuho iyobowe n’umusivili cyangwa umwofisiye wacyuye igihe mu gisilikare, ku gihe kitarenze amezi cumi n’abiri. Ibi byavuzwe na perezidansi ya Nijeriya.
Itangazo rigira riti: “Guverinema y’agateganyo, icyo gihe yategura amatora yo gusubiza ibintu mu buryo hubahirijwe Itegeko Nshinga”.
Ibi bitangajwe nyuma y’inama hagati ya Perezida Muhammadu Buhari wa Nijeriya n’umuyobozi w’intumwa z’umuryango wa CEDEAO, zatahutse muri iki cyumweru zivuye muri Mali mu biganiro n’abofisiye mu gisilikari cya Mali bayoboye kudeta kw’italiki ya 18 y’uku kwezi kwa munani i Bamako.