Muri Leta zunze ubumwe z'Amerika, abantu babiri baraye barashwe barapfa mu ijoro ryacyeye mu myigaragambyo imaze iminsi mu mujyi wa Kenosha, muri Leta ya Wisconsin, mu majyaruguru y'uburengerazuba bwo hagati.
Nk'uko polisi ya Kenosha yabitangaje uyu munsi, amasasu yumvikanye hafi saa sita y'ijoro. Usibye abantu babiri bapfuye, undi umwe yarakomeretse bikomeye. Ubu ari mu bitaro. Polisi irashakisha umuntu wabarashe, kugeza ubu utaramenywa.
Imyigaragambyo yatangiye ku cyumweru abapolisi bamaze kurasa umugabo w'umwirabura w'imyaka 29 y'amavuko witwa Jacob Blake amasasu menshi mu mugongo. Ababyeyi batangaza ko ashobora kuvurwa agakira, ariko ko ashobora kuzaba ikimuga burundu.
Guverineri wa leta ya Wisconsin, Tony Evers, yashyizeho amasaha y'umukwabo mu mujyi wa Kenosha kandi yoherezayo n'abasilikali ba leta, National Guard, bagera kuri 250 gufasha polisi kubungabunga umutekano.
Abapolisi babiri baregwa kurasa Jacob Blake bahagaritswe ku kazi kabo mu gihe anketi zirimo gukorwa. Kurasa Jacob Blake ku cyumweru nabyo byamenyekanye kubera amashusho ya videwo yafashwe kuri telefone igendanwa n'umuntu wihitiraga.
Ni nk'uko abantu bihitiraga bamenyekanishije uko Umwirabura George Floyd, yishwe ku italiki ya 25 y'ukwa gatanu gushize, ari mu mapingu n'umupolisi w'Umuzungu wari wamucikamije ivi ku gakanu iminota irenga umunani, mu mujyi wa Minneapolis, muri leta ya Minnesota, mu burengerazuba bwo hagati bwa Leta zunze ubumwe z'Amerika. Urupfu rwa Floyd rwabaye intandaro y'imyigaragambyo ikomeye yo kwamagana ivanguramoko n'urugomo rwa polosi ku Birabura.